Sam 90:1-16

¹God nolawa dewalala Moses sasa ema girumalen. Tatamba, e ipa walama uduudu no wanwanimba bolawa.

²E ipa wanwankasalalaida muriwa wadi dewamoana do muriwa tawo uduudu dewamoana.

³E apana diamoe waanase, “E leuitane popokau wanaitana!” Mo popokau mampe seganton, tane e leumoano popokau wananton.

⁴E emaawo ena 1,000 ipa walama dea rua, ena sa ipa tadina omowa kampaida rua.

⁵E apana inawau tauwadea os wadeiaubeiana auen ewawo nuaa tauwadea awawalepia rua. Mo ipa beran tadinaida kelontoia rua.

⁶Tadinaida beran kelowa ewaewau eubu, tane rawiwa mo rorontoie nonosintoi.

⁷E nuakadia debama no kadinede e nuaa no mainimbo kadileidia walamawe e saaidantitana.

⁸No kadimba uduudu e eweiana, no weregasaitana, tane e sabamo eweiana.

⁹No wainitano e nuaa kadileide; apana nonaupa itumpaiompa rua e no wanwanimba tauwadea os kampasaana.

¹⁰No wantaa enawa ipa 70, tane apana isiwa mukantopua wampuo enau 80 wadepi; no wainite sai uara donsaitana, mai wainipono daumaleipona ita bontitana.

¹¹Mai mida e nuakadia pokawaaida atenleipona, naita e nuakadia no atendewantepono, e saaidantepona.

¹²No wanwanimba walamawa kampaida winedia waeuwanewo atentate, ita insadewasa bedewe wainenta.

¹³Iawe God, insaisaa leusae nuaparembaitaa! Mai kaino nuaa kadilempa no mainimbo!

¹⁴Tadinaida uduudu euwanena e nuawadawadaa no baimba ipa winakasalala, ita no walama uduudu nuaeu mampe sasantonte wainenta.

¹⁵E sai debama ena uara bedewe nenaana, tane tauma deawaa dewasae walama dauma bedewe nuaeu nenona! Poka eteitana wadaaubea, ita wanwan euda ena uara bedewe wanta.

¹⁶No ipa e nolaa dewalala, e dewaa pokawaa euwanea, no obainimba euwamoa e ipa, mukamukaua ita debamawaida wainiana.