Ola Saam 90:1-16

¹YAWEI, brom longtaim yubin oldei jidan laiga seifwan pleis blanga melabat.

²Bifo yubin meigim ola hil en meigim dijan wel kamat, yu na bin oldei jidan det olagijawan God, en yu garra jidan God olagija.

³Wen yu tok, pipul dai en olabat bodi garra gobek langa graun.

⁴Det 1,000 yiya im laik wanbala dei langa yu. Olabat jis laik yestadei weya im gon olredi, en jis laik lilbit taim naitaim.

⁵Yu deigidawei melabat jis laik fladwoda. Melabat jidan nomo longtaim, laik drim wen im binij. Melabat jidan laiga purdiwan flawa wen im kamat moningtaim,

⁶en im binij sangodantaim.

⁷Wen yu gitwail, yu binijimap melabat. Melabat brabli bradin langa yu wen yu gitwail nomo lilbit.

⁸Yu pudum ola nogudbalawei blanga melabat lida langa yu, en ola nogudbala ting weya melabat bin dum sigridwei yu gin luk.

⁹Jis laik wen sambodi opinim en jadimap ai kwikbala, en lagijat du melabat laif binij kwikbala wen yu gitwail.

¹⁰Melabat laif maitbi jidan oni 70 yiya o maitbi 80 yiya if wi jidan strongbala, bat stil melabat abum loda trabul en soriwan filing langa ol detlot yiya. Detlot yiya binij kwikbala en wi binijap en wi gon.

¹¹Nobodi sabi det brabliwan pawa wen yu gitwail langa det nogudbalawei blanga pipul. Blanga tharran na melabat garra bradin en rispek yu olataim.

¹²Yu lenim melabat hau det laif blanga melabat im shotwan, wulijim melabat garra jinggabat brabli gudwei.

¹³Haulong mowa yu garra jidan wail lagijat? YAWEI, yu sori langa yu wekinmen olabat.

¹⁴Bilimap melabat ebri moning garram det filing blanga yu blanga laigim yu, wulijim melabat garra sing en jidan gudbinji langa melabat laif olataim.

¹⁵YAWEI, yu gibit melabat detmatj filing blanga jidan gudbinjiwei na blanga ola yiya weya melabat bin jidan nogudbinjiwei.

¹⁶Yu larram melabat yu wekinmen olabat, luk ola brabli haibala ting yu dum. Yu larram melabat biginini olabat hu garra jidan bambai luk yu brabli haibalawan pawa.