YƐSÃÃ 68:2-25

²Kuyie nyìtɛ́ kɛ còḿmúmu, kɛ̀ ku dootitɔbɛ̀ cìɛ́rì, kɛ̀ ku sĩ̀mbɛ̀ cokù ku ììkɛ̀.

³Kuyukú yɛ̀nní mɛ̀ɛ̀ botí ɑ mɛ mbɛ̀ cíɛnko, titɑnkṹǹtì yìɛ̀ri mɛ̀ɛ̀ botí muhɑ̃ɑ̃́ mmiɛkɛ, bɛnitiyɛibɛ kpɛrɛ mɛ ndò nKuyie nyììkɛ̀.

⁴Bɛ̀ɛ̀ dɔ̀ɔ̀ri dɛ̀ɛ̀ sìɛ́, bɛmbɛ diwɛ̀ì diì bɛ̀ bo kɛ̀ bɛ̀ yɑ̃̀nku Kuyie nyììkɛ̀! Diwɛ̀ì diì bɛ̀ kɛ̀itɛ kɛ̀ bɛ̀ ti ientii.

⁵Ndiènnɛ̀ kɛ dɛ́úkùnkoo Kuyie nyètìrì, tũntɛnɛ̀ kucɛ wèè kèríní yɛwɛtɛ̀ miɛkɛ nɛ̀ o sɑ̃ntɛ̀ o kpɛ́í, weè yètìrì tu: Ti Yiɛ̀. Nyɑ̃nkunɛ̀ o ììkɛ̀.

⁶Weè tu isénnìmbí cicɛ, weè kpɑ̀ mbɛkúpobɛ̀ kpɑ̀nnì, weè tu Kuyie nkɛ bo o cɛ̃sɑ̀ɑ̀tɛ̀ miɛkɛ.

⁷Kuyie nkuù duɔ̀ nsicɛ̃́ĩ bɛ̀ɛ̀ kpɑ bɛ kɔbɛ, kuù dènnìnko tikpetíntì kɛ ti duɔ̀ ndiwɛ̀ì, bɛ̀ɛ̀ yetɛ Kuyie nkpɛti bɛɛ̀ mɑ́ɑ̀ ɔ̃ mbo tɛdɔnkpetɛ̀.

⁸Kuyie nhɑ do ni dìì mɔ̀nnì ɑ kɔbɛ, ɑ do kérí dìì mɔ̀nnì dikpɑ́ɑ̀ cuokɛ̀,

⁹kɛtenkɛ̀ do sɑ̃ntimu, kɛ̀ mɛniɛ ncuutiní fɔ̃́ nKuyie nhɑ ììkɛ̀, fɔ̃́ nKuyie nkùù do kɔ̀tɛní Sinɑii tɑ̃rì kɛ́bɛnkɛ ɑmɑ́ɑ̀ ɑ kɔbɛ, Kuyie nyIsidɑyɛɛribɛ tũ nkù.

¹⁰Kuyie nfɔ̃́ɔ̃̀ cṹũnní fɛtɑsɑ̀ɑ̀fɛ̀, fɔ̃́ɔ̃̀ bónkùnnɛ ɑ tenkɛ̀ kɛ̀ɛ̀ do cĩ̀tɛ.

¹¹Dɛndɛ ɑ nìtìbɛ̀ bomɛ̀, Ti Yiɛ̀ nKuyie nfɔ̃́ɔ̃̀ dɛ̀ mbɛ̀ kɑ̀nnɛ ɑ sɑ̀ɑ̀ nkpɛ́í, fɔ̃́ɔ̃̀ tũ̀ntɛ dɛ kó dikɑ̀rì bɛsénnìbɛ̀ kpɛ́í.

¹²Ti Yiɛ̀ nKuyie nkuù duɔ́ ndinùù ku nɑ́ɑǹtì kpɛ́í, bɛ̀ɛ̀ tì pitírí kɛ̀ bɛ tĩ̀nnì sũ.

¹³Ti dootitɔbɛ̀ bɛkpɑ̀ɑ̀tìbɛ̀ nɛ̀ bɛ kó bɛhɑ̃ɑ̃pɔ̀mbɛ̀ bɛ̀ u yɛtɑ̀rɛ̀ nyɛ, kɛ̀ bɛnitipòbɛ̀ ɛí dɛ̀ɛ̀ bo bɛ cɛ̃́ĩ kɛ totí.

¹⁴Di yó mbo di kɑrɛ̀ nyɛɑ̀? Dikpɛtìnɔ́nkperi fìɛ̀ti dɑ̀ri mɛsɔɔ mpɛímɛ̀ mmɛ, kɛ̀ di cìtì dɑ̀ri mɛsɔɔ nwũɔ̃mɛ̀.

¹⁵Ti Yiɛ̀ nKuyie Mpɑkɛdɑɑ yóó cíɛ ndìì mɔ̀nnì bɛkpɑ̀ɑ̀tìbɛ̀, kɛ̀ mupɑ̃̀ɑ̃ mboomu muù dɑ̀ɑ́tí ditɑ̃rì Sɑdimɔɔ.

¹⁶Fɔ̃́ nKuyie nkó ditɑ̃rì, fɔ̃́ mBɑsɑ̃ɑ̃ tɑ̃rì, fɔ̃́ nditɑ̃rì dìì yómmɛ̀ sũ, fɔ̃́ mBɑsɑ̃ɑ̃ tɑ̃rì.

¹⁷Yɛtɑ̃rɛ̀ yɛ̀ɛ̀ yómmɛ̀ sũ, bɑ nte kɛ̀ dɛ̀ di yóu Kuyie ntɑ̃ɑ̃tɛ́ dìì tɑ̃rì kpɛ́í, kù bomu di ĩ́nkɛ̀ kɛ yó mbo sɑ̃́ɑ̃̀, kù yó ndɛ̀ bomu sɑ̃́ɑ̃̀.

¹⁸Kuyie nkpɑ̀rìsɛ̃ĩ́ bo sikɔupí sikɔupí nsi, kù do si nkɔ̀tɛnɛ̀ní Sinɑii ditɑ̃sɑ̀ɑ̀rì.

¹⁹A dèkɛ kɛĩ́nkɛ̀ nkɛ, kɛ nɛínɛ̀ní tidɑɑtì, kɛ̀ bɛnìtìbɛ̀ dɑ pɑ̃mmú yɛpɑ̃rɛ̀, bɑ́ bɛ̀ɛ̀ do yetírí ɑ kpɛti kɛ̀ bɛ̀ dɑ bɔ̀útɛ́, kɛ dò nkɛ́ mbo ɑ borɛ̀ fɔ̃́ nti Yiɛ̀ nKuyie.

²⁰Ti nsɑ̃ntí Kuyie nyɛwe yɛmɔu, kuù dɑ̀kɛ ti kpɛ́í, kuù tu ti dɛɛtíwè.

²¹Kuyie nkuù tu ti dɛɛtíwè, kuù yɛ̃́ kù bo yĩmɛ̀ kɛ́ tí dɛɛtɛ́nɛ̀ mukṹṹ.

²²Kuyie mmɛ̀nkɛ yóó pɔntɛmu ku dootitɔbɛ̀ yɔ, kɛ́pɔntɛ onitikɔ̀ùtì yuu nɛ̀ tiyùtì.

²³Kuyie mbɛ́immu kɛ tú kù bo cṹũnní ɑ dootitɔbɛ̀ bɛ̀ɛ̀ bo Bɑsɑ̃ɑ̃ tɑ̃rì, kɛ́dennɛní bɛ̀ɛ̀ bo dɑ̀mɛ́ɛ̀rì fũ̀ɔ̃̀.

²⁴Kɛ̀ dɛ̀ bo yie nkɑ̀ɑ nɑɑ̀cɛ̀i mbonti bɛ yĩ̀ĩ̀, kɑ̀ɑ kó simɔɔ́ bɛ̀ pɛ̀tɛ́ kɛ́cɑ́ɑ́kɛ́.

²⁵Kuyie nhɑ ɔ̃ɔ̃ kpɑ nkɛ́nɑ kɛ́nkũntiní, kɛ̀ bɛnìtìbɛ̀ wùómmu ɑ kpɑ̀rìnɑfɛ ɑ cɛ̃sɑ̀ɑ̀tɛ̀ miɛkɛ, fɔ̃́ nKuyie nkùù n te, fɔ̃́ n kóo kpɑ̀ɑ̀tì.