SALAMO 68:2-25

²Lai ese kwalahu e odaia ohomu heḡereḡerena unu bae odadia oho toma; Wax na lahi badibadinai e vevemu na heto, kara dika taudia na unu bae mase toma, Dirava vairanai.

³A kara maoromaoro taudia na bae moale; Dirava vairanai bae hisi dae, moale ai bae honu honu dae.

⁴Ane avabia, Dirava ena, ia ladana ba hanamoa emu ane ai; ane ba ladaia isi, ori ai e guimu Diravana ena; ia ladana na Iehova, ia vairanai ba hisi dae.

⁵Dirava na ihareha tamadia bona vabu igimadia, ena noho gabuna helaḡana ai.

⁶Dirava ese noho-edea taudia edia iduhu e henidiamu, iḡui taudia e hakaudia lasimu, e hataḡadiamu; a gwau-emuri taudia na tano kaukauna ai e nohomu.

⁷Dirava e, emu orea taudia vairadiai o raka lasi bona tano gagaena o rakaia hanai negana ai, (Selah)

⁸tano e laga bona guba medudia e diho badabada, Dirava vairanai. Sinai ororona bunai, Dirava vairanai e heude-heude, Israel Diravana vairanai.

⁹Dirava e, medu o hadihoa badabada; emu tano e kaukauva negana ai o hapariparia;

¹⁰emu seri na ia lalonai edia noho gabuna e davaria. Dirava e, emu kara namo bagunai ogoḡami taudia adia o henidia.

¹¹Ḡaubada ese ena hahedua herevana e gwauraiamu hutuma bada ese e piuamu;

¹²tuari oreadia pavapavadia e heaumu, e heaumu. Ruma ai e nohomu hahinedia ese tuari ai e dadi kohudia e haridiamu,

¹³mamoe edia maḡu ai e nohomu hahinedia ese. Pune hanina na silver amo e heḡova, hanina huidia na gold gadoka-gadokana amo e heḡova.

¹⁴Siahu-idoinai Diravana ese hanua pavapavadia na Salmon ai e hakarohodia negana ai, snow na unuseni ai e diho.

¹⁵Ororo badana e, Basan ororona! Dorina momo ororona e, Basan ororona!

¹⁶Dorina momo ororona e, dahaka o hamuemu? Dirava e uramu baine noholaia ororona, Oibe, Iehova baine noholaia hanaihanai ororona, dahaka hamuena o karaiamu?

¹⁷Ḡaubada na Sinai amo gabu helaḡana ema, mai kariota aukadia gerebu rua ida, oibe, mai kariota daha daha ida.

¹⁸Oi na ororo ḡaulatalatana ai o dara dae, iḡui taudia na murimu ai o hakaudia dara. Herahia ḡaudia na taunimanima edia amo o abi, oibe, gwau-hemuri taudia edia amo danu, Ḡaubada Iehova unuseni ai baine noho na totona.

¹⁹Ḡaubada aita hanamoa! Ia ese dina iboudiai e abida isimu; Dirava na eda mauri. (Selah)

²⁰Eda Dirava na hahemauri Diravana; Ḡaubada Dirava ese mase amo e harohoda maurimu.

²¹A Dirava ese ia inaina kwaradia baine huaridia, ena kara havara ai e rakamu tauna na tubuana mai huina baine huaria.

²²Ḡaubada eto: Basan amo baina loulaidia, davara dobuna gabudia amo baina loulaidia,

²³aemui na rara ai ba hadigudia totona, bona emui sisia maladia na inaimui raradia bae demaria totona.

²⁴Dirava e, mai hairaimu ida o raka hanaimu, egu Dirava, egu Pavapava, na gabu helaḡana ai e raka vareaimu, mai hairaina ida.

²⁵Ane e abimu taudia na vairai e rakamu, hatai-hatai ḡaudia e hataimu taudia na muri ai, bogaragi ai na ulato ese edia tareko e hareḡemu.