1Tana bona Isaac te tonikama tua, me dutu vania ge ke rorodo, gaia te holoa Esau na diki dalena na kamanagho, me ghaghua, “?Kula dalegu?” Ma Esau te bosa tughu me ghaghua, “?Na hava Tamagu?”
2Ma Isaac te ghaghua, “Inau tu tonikama tua, mu mua ghilala ke daro na volagu.
3Keri ge ko lavighi nimua na baghe mana kuali, mo ko tona tana tautalu, mo ko hilivia vaniu mai siki maumanu asi.
4Ko gonidila vaniu na vanga te liona na liogu me ke loghoa na nainami te uto. Mo ko lavia vaniu mai, mu ku ghania. Keri ge ku vahegho na vauto, ke vanigho ighoe na dalegu na kamanagho naghona ge ku mate.”
5Ma Rebekah te rongovia na hava Isaac te bosa vania Esau. Mi tana bona Esau te rughuhoru ge ke va hilivighi mai na maumanu asi,
6ma Rebekah te ghaghua vania na dalena Jacob, “Inau tu rongovia na tamamu te bosa vania Esau, me ghaghua,
7‘Tona mo ko va matea siki maumanu asi, mo ko gonidila vaniu na puku ni vanga te uto. Mi murina ku ghania, eliogu ge ku vautogho tana matana Yahweh i naghona ge ku mate.’”
8Rebekah te bosa so, “Kula dalegu, itaeni ko goni taonia na hava tua ku bosaa vanigho.
9Ko tona rughuhoru va tana lei ovu ni volivoli ni maumanu mo ko lavighi vaniu mai erua na dale goat vaolu. Inau ku gonidila vania tamamu na vanga te uto ngangata te liona tana goat raeni.
10Mo ko lavighi na vanga raeni vania tamamu, ma gaia ke ghanighi ge ke va hegho na vauto tughua a Esau inaghona ge ke mate.
11Ma Jacob te bosa tughu, “Kula Tinagu, e mua malumu koro pegoa na tamagu. Ko ghanaghana va ivei te vagha na vuvuluna na hulina Esau maia ivei te vagha na madolona na ghuighuligu inau.
12?Ivei ke ghaghua ke vagha ke tabeu a tamagu? Agaia ke ghilala kalea inau tu pegoa, ma gaia ke varangau vamua me ke mua heu na vauto.”
13Ma Rebekah te ghaghua, “Dalegu tu dolovigho, lubatia na vavaranga keri ge ke tumu ivuvungagu. Mo ko gonia vamua na hava tu bosaa vanigho. Ko tona mo ko lavighi mai na goat.”
14Keri ge Jacob te taonighi na lei kokoe te bosai vania tinana, me holai vania mai ra rua na goat. Ma tinana te lavighi rana goat, ge gonia na puku ni vanga te vagha te liona Isaac.
15Ma gaia Rebekah te lavia nina na puku ni pupulu Esau te ghahai tua ilokana na vale tapole me pupulua nia Jacob.
16Me saroi na limana mana luana Jacob nia na ghuighuli ni goat te vuvulugha.
17Ma Rebekah te hea na popo ni vanga, te uruurua ngangata, maia na balu berete tara vaho bitighi.
18Ma Jacob te lavia na popo ni vanga vania tamana me ghaghua, “?Kula Tamagu?” Ma Isaac te bosa tughu me ghaghua, “Eo! ?Ahei eni? ?Esau pa Jacob?”
19Ma Jacob te bosa tughu, “A Esau na dalemu na kamanagho. Aeni tua na maumanu asi. U goni taonia tua na hava to bosaa vaniu nia, me momoha tua. Ko sopou dato mai mo ko vanga, ge ko vaheu nimua na vauto.”
20Ma Isaac te huahuati, “?Kula dalegu, ivei te ghaghua ge o tangomana na sodo minaminaana?” Ma Jacob te bosa tughu, “Na pukuna a Yahweh, nimua na God, te hangau ge u sodo minaminaa.”
21Ma Isaac te ghaghua vania Jacob, “Ko tughuru ghalagha mai iani. Eliogu ge ku tabegho ge ku taluutunia to Esau utuni sughua.”
22Ma Jacob te tona ta tamana, ma Isaac te tabea. Ma Isaac te bosa heghena, “Na kokoe te vagha na kokoena Jacob, hauva na limana te vuvulugha te vagha Esau.”
23Me mua ghilala pukulaghinia te Jacob, na pukuna na limana Jacob tara vaghai sono na limana Esau tara vuvulua. Keri ke, Isaac te dutu ni vautoana Jacob,
24me huatia, “?Na puku ni dalegu a Esau sughua ighoe?” Ma Jacob te bosa tughu, “Eo, inau utuni!”
25Keri ge ghaghua Isaac, “Kula dalegu, ko lavia vaniu mai na vinahina na maumanu ge ku vanga ge ku vahegho nigua na vauto.” Ma Jacob te lavighi na vanga va ta tamana, ma Isaac te ghanighi. Me inuvia ghua na wine a Jacob te gonidilaa vania.
26Keri ge ghaghua Isaac, “Kula dalegu, ko mai tagua mo ko nonginongiu.”
27Ma Jacob te va tona me nonginongia. Mi tana bona te urumighi na lei pupuluna, Isaac te taluutunia ge vautoa na dalena, me ghaghua, “Na uruuruna na dalegu te vagha na uruna na leghai te va vautoi tua Yahweh.
28Mi nau ku nongia God ke va hegho mai na kebu ge ke volai nimua na lei subasuba, ge ko loghoa na puku ni baore te hali tana lei nimua na subasuba mana lei grape tara gonighi nia na wine.
29Rana lei kema kara nimua na vure ni lutu, ma kara taonia na hava to bosaa. Mi ghoe ko vunaghi pungisira na lei hoghomu. Rana lei vaivaridira tinamu kara nigho kikinima. Ma rahei tara bosa kaugho, God ke bosa kaura. Ma rahei tara vautogho, God ke vautora.”
30Mi tana bona Isaac te vauto sokoa vaso Jacob, me ke rughu horu sania tamana, Esau te pulohi mai ta nina na rughuhoru ni hili.
31Esau te gonidila vania tamana na puku ni vanga te liona, na vinahina na maumanu asi, me lavia va ta tamana. Ge ghaghua gaia Esau, “Kula tamagu, inau tu mai tua, mi nau tu lavia mai na maumanu asi to liona. Ko sopou dato mai mo ko ghania, keri ge ko vaheu nimua na vauto.”
32Ma Isaac te huatia gaia, “?Ahei ighoe?” Ma gaia te bosa tughu, “Inau a Esau, na dalemu na kamanagho.”
33Ma Isaac te tatata me kanoragha, ge ghaghua, “Ma hei vaso ka, te vaheu na maumanu asi, mu ghania vaso? Mu vautoa tua gaia nia na puku ni vauto, keri ge o mai ighoe. Ma God ke vautoa gaia, na pukuna ku mua tangomana na tughuana nigua na vauto.”
34Mi tana bona Esau te rongovia na tamana, gaia te tangi ngangaraha, me kurutia tamana me ghaghua, “Kula tamagu, ko vautou mai ghua inau!”
35Mana tamana te vania, “A hoghomu te pegou me lavi kehaa tua nimua na vauto.”
36Ma Esua te bosa, “E utuni sughua na ahana ke, Jacob, na pukuna erua tua na tughuru ni gitoagu tana lei lologho. Na diki te lavia nigua na tunuva ni kamanagho, mi taeni te lavia nigua na vauto. ?Mi vei tea o talukehaa vaniu sono sakai na vauto?”
37Ma Isaac te bosa vania Esau me ghaghua, “U talua tua Jacob ge ke nimua na vunaghi haba mu tughuniladaa tua ge na lei kulana vure kara nina vure ni lutu. Mu baubahu vania ge gaia ke lologho au vule tana subasuba mana wine kara subo vaa. ?Mana hava iga ke ghoi hagha vanigho?”
38Ma Esau te nongia sono a tamana me ghaghua, “E taho tua sakai na vauto ke ghana olia vaniu? Kula tamagu, ko vautou ghua inau.” Ma Esau te tangi me dikalio.
39Keri ke, Isaac te ghaghua vania, “Ighoe ko kabu hauvia tana pari uto, mo ko hauvia ghua na uha uto te butu mai ikokou.
40Mi ghoe ko nia vola na isi. Mi ghoe ko lutu vania a hoghomu. Hauva, mi tana bona ko luba sania, ge ko tatavahale itatana.”
41Keri ke, Esau te nia ghighirou a Jacob na pukuna te gitoa nina na vauto. Keri ge ghaghua tana ghanaghanana heghena, “A tamagu ke mua hau me ke mate, ma ka nia tangimate. Tana bona na posabongi ke soko, mi kakeri vaho ge ku labumatea Jacob.”
42Ma siki sakai te rongovia na hava te bosatatea Esau, ge va tughunia vania Rebekah. Ma gaia te holoa mai Jacob, ge bosa vania, “A Esau te ghanaghana ge ke lavitughugho, me ke labu mategho.
43Aeni na hava ko gonia. Ko sogha polo va ta vaivinegu Laban te hagha i Haran.
44Ko kabu kolua polo ke soko nina lei ghanaghana dika Esau itamua.
45Tana bona vaho ke nighi ponolio na lei totobo to gonighi vania, ge ku bosa vanigho gatu. Na hava na pukuna ge ku sanighau iroghau udolu ta sakai na bongi vamua?”
46Ma Rebekah te ghaghua vania Isaac, “Inau to nia vahaghitaili mu nia lugu nigua na lei vinekama voo ni kemana Het. Ke vagha Jacob ke tauna siki sakai tadira, e manana ku mate nigua vaso ge ku mua ghoi righia.”
