Titi 3

1

2

3

¹Nɑ́kɛ́ bɛ kɛ̀ bɛ̀ ndé kɛtenkɛ̀ yɛmbɛ̀ nɛ̀ bɛkpɑ̀ɑ̀tìbɛ̀, kɛ́nyíé mbɛ kpɛti, kɛ́mpĩ́ mmutɔ̃mmú kɛ̀ dɛ̀ wenni.

²Bɛ̀ bɑ́ mmɔkɛ tisĩ́ntɛnɑ́ɑǹtì, bɛ̀ bɑ́ nwɑnti yɛkpɑ̀rɛ̀, bɛ̀ nwɑnti bɛnìtìbɛ̀ bɛmɔu kó mɛsɑ̀ɑ̀.

³Ti múnkɛ do tú tiyɛìntì nti, kɛ mɔkɛ mɛyɛ̀mmɛ̀ yɛimɛ, kɛ í yíé ntìmɑtì, kɛ tũ nkucɛ yɛiku, kɛ dɔ́ kutenkù kpɛrɛ dɛmɔu, kɛ dɔɔri dɛ̀ɛ̀ í wenni, kɛ ɛ̃ɛ̃nnɛ̀ titɔbɛ̀, kɛ beúnɛ̀ titɔbɛ̀.

⁴Kɛ̀ Kuyie nti dɔ́ kɛ ti dɔ̀ɔ̀ mɛsɑ̀ɑ̀ nkɛ ti dɛɛtɛ́.

⁵Dɛ̀ í tu ti dɔ̀ɔ̀ mɛsɑ̀ɑ̀ mmɑmɛ̀, kù ti kuɔ́ mmɛsémmɛ̀ mmɛ. Bɛ̀ ti kùnnɛ dìì mɔ̀nnì ndi mɛniɛ mMuyɑɑ́nsɑ̀ɑ̀mù ti dɔ̀ɔ̀mɛ̀ bɛnitipɑ̀mbɛ̀ kɛ ti duɔ́ mmufòmmu pɑ̀mmù.

⁶Ti Yiɛ̀ nYesu Kirisi weè te kɛ̀ Kuyie nti duɔ́ mMuyɑɑ́nsɑ̀ɑ̀mù mɛdiɛ̀.

⁷Ku kó mɛsɑ̀ɑ̀ mmɛɛ̀ te kɛ̀ ti wenkɛ, kɛ bɑɑ mufòmmu mùù bo sɑ̃́ɑ̃̀ kù yɛ̃ nkù yóó ti duɔ́ mmù.

⁸Dɛ kó tinɑ́ɑǹtì tu timɔ́mmɔnti nti kɛ̀ n dɔ́ ɑ tì mbɛ̀ tié nkɛ̀ bɛ̀ɛ tì cɔutɛ́ kɛ̀ tìi bɛ̀ teennɛ̀, kɛ̀ bɛ̀ ndɔɔri mɛsɑ̀ɑ̀ ndɛ̀ɛ̀ wenni kɛ yóó teennɛ̀ bɛnìtìbɛ̀.

⁹Á bɑ́ nkɔkɛ́ tisĩ́ntɛ́nɛìtì miɛkɛ: Ifukɛ kó tinɛìtì nɛ̀ Sifubɛ kó ikuɔ́, dɛ ce nyɛkpɑ̀rɛ̀ nyɛ, dɛ̀ í teennɛ̀ mùmɑmù.

¹⁰Kòò mɔù totírí Kirisi kɔbɛ, ɑ́ ò cɑu nkucɛ mɛ̀dɛ́mɛ̀ kòo yetɛ ɑ́ ò bɛ̀ti.

¹¹Dɛ yiɛ̀ nkó kubotí fetimu, kɛ dɔɔri mɛyɛi nkɛ cɑɑ̀ri omɑ́ɑ̀.

¹²Kɛ̀ n tɔ̃nko Atɛmɑɑ yoo Tisiki. Á kɔtɛní mɛcɑ̃ɑ̃ Nikɔpɔdiisi n yó ndɛ mbo diyɔ̃ɔ̃̀.

¹³Teennɛ̀ Senɑɑsi obeéntì nɛ̀ Apodoosi kɛ̀ bɛ̀ɛ kɔtɛ kupɔ̀ɔ̀kù kɛ̀ dɛ̀mɑrɛ̀ bɑ́ɑ́ bɛ̀ dòńtɛ́.

¹⁴Ti kɔbɛ múnkɛ dò nkɛ́ndɔɔrimu mɛsɑ̀ɑ̀, kɛ teennɛ̀ bɛnìtìbɛ̀ bɛ̀ɛ̀ bo ticĩ̀tì miɛkɛ kɛ bɑ́ɑ́ sɔ̃́ntɛ́ kɛ́mbo dɛtetìrɛ̀.

¹⁵Kirisi kɔbɛ bɛ̀ɛ̀ bo diɛ mbɛ̀ dɑ dɔunko. Á dɔunko Kirisi kɔbɛ bɛ̀ɛ̀ bo di ciɛ. Kuyie nkó mɛsɑ̀ɑ̀ nní ndi bonɛ̀ dimɔu!