Taalie 14:9-29

⁹Xaxilitare yoma yunubi tongofe ma, kɔnɔ tinxintɔɛ Ala xa hinnɛ nan fenma.

¹⁰Mixi a yɛtɛ xa tɔɔrɛ kolon a bɔɲɛ kui, a mu a xa sɛɛwɛ masenma mixi gbɛtɛ bɛ.

¹¹Mixi ɲaaxie xa denbaya halakima nɛ, tinxintɔɛe tan xa denbaya fanma nɛ.

¹²Mixi ɲɔxɔ a ma a a ɲɛrɛ ki fan, a fa li kɔrɛ a na gbaloe kira nan xɔn ma.

¹³Mixi nɔma yelede a dɛ ra, a tɔɔrɔxi a bɔɲɛ kui. Sɛɛwɛ nɔma mafindide tɔɔrɛ ra.

¹⁴Mixi ɲaaxi yo, mixi fanyi yo, e birin e xa wali sare sɔtɔma nɛ.

¹⁵Xaxilitare lama nɛ mixi birin xa masenyi ra, kɔnɔ xaxilima kira matoma nɛ beenu a xa bira na fɔxɔ ra.

¹⁶Xaxilima gaaxuma nɛ Ala ya ra, a fa gbilen fe ɲaaxi fɔxɔ ra, kɔnɔ xaxilitare tan soma nɛ na fe ɲaaxi kui mafuren.

¹⁷Mixi naxan bɔɲɛ tema mafuren, a daxuɲa nan nabama. Mixi madaxui mu rafan mixi yo ma.

¹⁸Daxuɲa findima nɛ xaxilitare kɛ ra, xaxilimae tan lɔnni nan sɔtɔma.

¹⁹Mixi ɲaaxie fama nɛ e xinbi sinde tinxintɔɛe bun ma, e kantari nan fenma tinxintɔɛe xɔnyi.

²⁰Setare raɲaaxu birin ma, hali a dɔxɔboore, kɔnɔ banna rafan mixi gbegbe ma.

²¹Mixi naxan yoma a ngaxakerenyi ma, a bara yunubi sɔtɔ, kɔnɔ naxan kinikini tɔɔrɔmixi ma, na bara sɛɛwɛ sɔtɔ.

²²Mixi naxee fe ɲaaxi maɲɔxunma, nee bɔnɔma nɛ. Kɔnɔ naxee fe fanyi maɲɔxunma, na kanyie marafanyi nun nɔndi nan toma.

²³Geeni na wali birin kui, kɔnɔ wɔyɛnyi gbansan findima setareɲa nan na.

²⁴Bannaya nan na lɔnnila sare ra, daxuɲa nan tun luma lɔnnitare tan yi ra.

²⁵Seede nɔndi falɛ mixi nii ratangama nɛ, kɔnɔ wule falɛ mixi madaxuma tun.

²⁶Mixi naxan gaaxu Alatala ya ra, a tan nun a xa die luma nɛ kantari kui.

²⁷Alatala xa yaragaaxui simaya fima nɛ mixi ma, alako e xa ratanga gantanyi ma naxan findima faxɛ ra.

²⁸Ɲama xa gboe findima mangɛ xa xunnakeli nan na, kɔnɔ ɲama xa xurunyi findima mangɛ xa xunnagore nan na.

²⁹Xaxilima bɔɲɛ te xɔnɔ, kɔnɔ xaxilitare a xa daxuɲa masenma nɛ a xa bɔɲɛ te saabui ra.