Taalie 12:3-23

³Ɲaaxuɲa mu xili xungbe fima mixi ma, kɔnɔ sese mu a niyama tinxintɔɛ sankee xa tala.

⁴Ginɛ fanyi findima a xa mɔri xa xunnakeli nan na, ginɛ ɲaaxi tan luma nɛ alɔ kuli naxan na ɲinyi kui.

⁵Mixi tinxinxie xa maɲɔxunyi fan, kɔnɔ mixi ɲaaxi xa marasi mixi madaxuma nɛ.

⁶Mixi ɲaaxi xa wɔyɛnyi mixi faxama nɛ, kɔnɔ tinxintɔɛ tan xa wɔyɛnyi mixi rakisima nɛ.

⁷Mixi ɲaaxie xa fe fama nɛ kanade, kɔnɔ sese mu mixi tinxinxie xa denbayae toma.

⁸Ɲama lɔnnilae matɔxɔma nɛ, kɔnɔ bɔɲɛ ɲaaxi kanyie, e yoma nɛ nee ma.

⁹Yɛtɛ magore, malima keren peti na naxan bɛ, a fisa yɛtɛ igboe bɛ, baloe mu na naxan yi ra.

¹⁰Tinxintɔɛ mɛɛnima nɛ a xa xuruse ma, kɔnɔ mixi ɲaaxi tan ya ixara.

¹¹Bɔxi rawali baloe sɔtɔma nɛ, kɔnɔ lɔnnitare birama fe fufafu nan fɔxɔ ra.

¹²Mixi ɲaaxi harige fenma tinxintareya ra, kɔnɔ tinxintɔɛ sankee tan sigama bɔxi suxu ra nɛ.

¹³Fe ɲaaxi findima gantanyi nan na mixi ɲaaxi bɛ, kɔnɔ tinxintɔɛ a yɛtɛ ratangama nɛ na tɔɔrɛ ma.

¹⁴Wɔyɛn fanyi findima xunnakeli nan na mixi bɛ, alɔ mixi to a xa wali sare sɔtɔma.

¹⁵Lɔnnitare a maɲɔxunxi a a xaxili fan, lɔnnila tan marasi nan fenma.

¹⁶Lɔnnitare bɔɲɛ te rafura, lɔnnila tan mu konbi yaabima.

¹⁷Tinxintɔɛ nɔndi nan falama a boore xun, kɔnɔ seede ba ɲaaxi wule nan tun madɔxɔma.

¹⁸Mixi dɛ wuyaxi xa wɔyɛnyi mixi maxɔnɔma nɛ alɔ santidɛgɛma, kɔnɔ lɔnnila tan xa wɔyɛnyi mixi nan nayalanma.

¹⁹Nɔndi falɛ xa masenyi mu masarama, kɔnɔ wule falɛ xa masenyi luma nɛ masara ra.

²⁰Maifui nan na mixi ɲaaxi bɔɲɛ kui, sɛɛwɛ na mixi bɛ, naxan gere raxubenma.

²¹Fe ɲaaxi yo mu tinxintɔɛ lima, kɔnɔ mixi ɲaaxie na nan tun sɔtɔma.

²²Alatala wule falɛe xɔnma nɛ, a hinnɛma nɛ nɔndi falɛe ra.

²³Lɔnnila a xa lɔnni masen tɛmui kolon, lɔnnitare tan a xa daxuɲa nan ifalama a xui itexi ra.