Än Salomon Fos 12:3-23

³Esap wor eman a tongeni nüküchar ren an föföringau, nge eman chon pwüng esap fokun mwökütüküt.

⁴Eman fefin mi mürina a usun chök epa mwärämwär fän iten pwülüan, nge neminewe a atoto säw won pwülüan a usun chök kanser lon chün ätewe.

⁵Ekewe chon pwüng ra ekiekietä mine a pwüng, nge än ekewe aramasangau öüröür a atuputup.

⁶Än ekewe aramasangau kapas ra ni aramas, nge än ekewe chon pwüng kapas ra angasa aramas.

⁷Ekewe aramasangau ra kuf o rosola, nge chon leimwen ekewe chon pwüng repwe nonometiu.

⁸Aramas repwe mwareiti eman mi mirit aükük ngeni an mirit, nge repwe oput eman mi tiparoch.

⁹Eman aramas tekison mi angang pwe epwe wor anan a mürina seni eman mi pwomweni pwomwen eman aramas tekia, nge esap wor anan.

¹⁰Eman chon pwüng a tümwünüöchü nöün man, nge ekewe aramasangau ra chök ariaföüü nöür man.

¹¹Eman mi angang won fanüan epwe wor chomong anan mongö, nge eman mi föri sokopaten angang mi lomotongau esap wor an mirit.

¹²Ekewe aramasangau ra chök tipeni föför mi ngau, nge ekewe chon pwüng ra nüküchar.

¹³Eman aramas mi ngau a tup ren püsin kapasen awan, nge eman chon pwüng esap tolong lon osukosuk.

¹⁴Eman aramas epwe angei liwinin alongolong won mine a apasa ika föri, epwe chök angei mine a fichiti.

¹⁵Eman mi tiparoch a ekieki pwe a pwüng lon an föför, nge eman mi tipachem a aüseling ngeni kapasen öüröür.

¹⁶Eman mi tiparoch a müttir pwärätä an song, nge eman mi mirit a asarongorongala seni kapasen esit.

¹⁷Eman chon pwärätä mi wenechar a pwärätä mine a let, nge eman chon pwärätä mi mwäl a eäni kapas chofana.

¹⁸Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge än ekewe chon tipachem kapas ra atoto pöchökül.

¹⁹Kapas mi let repwe nonom tori feilfeilachök, nge kapas chofana repwe chök nonom lon fansoun mochomoch.

²⁰Ekiekin atuputup a nonom lon leluken chokewe mi ekiekietä mine a ngau, nge chokewe mi alapala kinamwe ra pwapwa.

²¹Esor feiengau epwe tori ekewe chon pwüng, nge chomong osukosuk epwe tori ekewe aramasangau.

²²Ewe Samol mi Lapalap a oput ekewe aramas mi chofana, nge a pwapwa ren chokewe mi apasa mine a let.

²³Ekewe aramas mi mirit resap pwärala ar silelap, nge ekewe mi tiparoch ra asilefeili ar umwes.