Sofoni 3

1

2

3

¹Bɔ̃rurobɑ bɛɛ Yerusɑlɛmuɡibu. Domi i sɑ̃ɑwɑ mɛm nɔɔ sɑribɑ, mɑ i disi mɔ, i dɑm diinɑmɔ.

²I ku rɑ ɡooɡii nɔ. I ku rɑ mɑɑ sɛɛyɑsiɑbu wure. I ku rɑ Gusunɔ bɛɛn Yinni nɑɑnɛ ko. I ku rɑ mɑɑ nùn susi.

³Bɛɛn sinɑ ɑsɑkpɔbu bɑ sɑ̃ɑwɑ nɡe ɡbee sinɑn si su kukirimɔ wuu ɡe sɔɔ. Mɑ bɛɛn siri kowobu bɑ mɑɑ sɑ̃ɑ nɡe yokɑn purukɑ ni nu ku rɑ dĩɑnu yi bururun sɔ̃.

⁴Gusunɔn sɔmɔbu bɑ sɑ̃ɑwɑ nɑɑnɛ sɑribɑ. Bɑ ku rɑ ɡere ye Gusunɔ u bu sɔ̃ɔwɑ. Bɛɛn yɑ̃ku kowobu bɑ Gusunɔn sɑ̃ɑru disi dokemɔ. Bɑ ku rɑ woodɑbɑ mɛm nɔɔwɛ.

⁵Adɑmɑ kɑ mɛ, Yinni Gusunɔ u wɑ̃ɑ kɑ bɛɛ. U sɑ̃ɑwɑ ɡemɡii, u ku rɑ weesu ko. U rɑ win ɡem terɑsiewɑ siribu sɔɔ bururu bɑɑtere. U ku rɑ tɔ̃ru bure. Adɑmɑ tɔn kɔ̃sobɑ bɑ kɔ̃sɑ mɔ̀, sekurɑ kun bu mɔ̀.

⁶Wi, Yinni Gusunɔ u nɛɛ, u bwese ɡirinu ɡo, mɑ u nin ɡbɑ̃rɑnu kɑ nin kuku yenu kɔsukɑ. U derɑ ɡoo ku rɑ mɑɑ sĩ nin swɛɛ sɔɔ. U nin wusu kɔsukɑ, ɡoo kun mɑɑ wɑ̃ɑ mi.

⁷Yerɑ u nɛɛ, bɛɛ Yerusɑlɛmuɡibu, ì n dɑɑ nùn nɑsie, mɑ i win sɛɛyɑsiɑbu wurɑmɔ, u ǹ dɑɑ bɛɛn wɑ̃ɑ yenu kɔsukumɔ. U ǹ dɑɑ mɑɑ bɛɛ sɛɛyɑsiɑmɔ nɡe mɛ u kuɑ, ɑdɑmɑ i rɑ n sɛndewɑ kɔ̃sɑn kobu sɔɔ.

⁸Yen sɔ̃, wi, Yinni Gusunɔ u nɛɛ, i nùn mɑruo tɔ̃ɔ tè sɔɔ u koo se u bɛɛ wɔrimɑ. Domi u ɡɔ̃ru doke u bwesenu kɑ nin sinɑmbu mɛnnɑ u bu win mɔru sɔ̃ɔsi kɑ yen dɑm. Kpɑ n sɑ̃ɑre nɡe bɑ tem mɛ kpuro dɔ̃ɔ doke win mɔrun sɔ̃.

⁹Sɑɑ ye sɔɔ, Yinni Gusunɔ u koo tɔmbun yɑri dɛɛrɑsiɑ kpɑ bu win yĩsiru soku bu nùn sɑ̃ sɑnnu.

¹⁰Be bɑ nùn sɑ̃ɑmɔ bɑ yɑrinɛ bɑɑmɑ, bɑ koo kɑ nùn kɛ̃nu nɑɑwɑ sɑɑ Etiopin dɑɑnun ɡurun di.

¹¹Yen tɔ̃ɔ te, bɛɛ win tɔmbu Isirelibɑ, i ǹ sekuru wɑsi bɛɛn dɑɑ kɔ̃sɑ kɑ bɛɛn torɑ ni i kuɑ sɔɔ. Domi u koo be bɑ rɑ tii sue bɛɛn suunu sɔɔ wunɑ, kpɑ bɛɛn tiin tɔn biɑru tu kpe win ɡuu dɛɛrɑrun wɔllɔ.

¹²U koo de tɔmbu fiiko bɑ n wɑ̃ɑ bɛɛn suunu sɔɔ be bɑ ǹ tii sue. Bɑ koo win yĩsiru soku u kɑ bu kɔ̃su.

¹³Isireli be bɑ tie, bɑ ǹ mɑɑ kɔ̃sɑ mɔ̀. Bɑ ǹ mɑɑ weesu mɔ̀. Gɑri kɔ̃si yi ǹ ko n wɑ̃ɑ ben nɔsɔ. Bɑ ko n wɛ̃rewɑ, ɡoo kun bu bɑɑsimɔ.

¹⁴Bɛɛ Siɔniɡibu, i ɡɔ̃ru dobun kuuki koowo. Bɛɛ Isirelibɑ kpuro ɡesi, i nuku dobun kuuki koowo. Bɛɛ Yerusɑlɛmuɡibu, i yɛ̃ɛrio kpɑ i nɑsɑrɑn kuuki ko kɑ bɛɛn ɡɔ̃ru kpuro.

¹⁵Yinni Gusunɔ u bɛɛn sɛɛyɑsiɑbu kpeesiɑ bi u koo rɑɑ bɛɛ ko. U bɛɛn yibɛrɛbɑ yɑrinɑsiɑ. Gusunɔ sinɑ boko, bɛɛ Isirelibɑn Yinni, u wɑ̃ɑ bɛɛn suunu sɔɔ. I ǹ mɑɑ kɔ̃sɑ ɡɑɑ wɑsi.

¹⁶Yen tɔ̃ɔ te, bɑ koo bɛɛ Yerusɑlɛmuɡibu sɔ̃ bu nɛɛ, i ku bɛrum ko Siɔniɔ. I ku de bɛɛn ɡɔmɑ dwiiyɑ.

¹⁷Gusunɔ bɛɛn Yinni u wɑ̃ɑ bɛɛn suunu sɔɔ. U sɑ̃ɑwɑ nɡe tɑbu durɔ wi u rɑ fɑɑbɑ ko. U koo nuku doo bɑkɑbu ko bɛɛn sɔ̃. U ǹ mɑɑ ɡɑ̃ɑnu ɡerumɔ yèn sɔ̃ u bɛɛ kĩ. U ko n nuku doo bɑkɑbu mɔ.

¹⁸Be bɑ wɑ̃ɑ nuku sɑnkirɑnu sɔɔ yèn sɔ̃ bɑ kɑ Yerusɑlɛmu tondɑ, bɑ wɑ̃ɑ sekuru sɔɔ te tɑ bu buniɛmɔ nɡe sɔmunu, mɑ bɑ ku rɑ mɑɑ win tɔ̃ɔ bɑkɑnu di, beyɑ u koo mɛnnɑmɑ.

¹⁹Yen tɔ̃ɔ te, u koo be bɑ bɛɛ dɑm dimɔ wɔri, kpɑ u yɛmɔbu fɑɑbɑ ko. U koo be bɑ rɑɑ ɡirɑ mɛnnɑ kpɑ u de bu tɔmbu nuku dobu wɛ̃ kpɑ bu yĩsiru yɑri tem kpuro sɔɔ mi ben bɑɑwure u rɑɑ sekuru dimɔ.

²⁰Yen tɔ̃ɔ te, u koo de i wurɑmɑ. Sɑɑ ye sɔɔ, u koo bɛɛ mɛnnɑ. Tɔmbu bɑ koo bɛɛ bɛɛrɛ wɛ̃ kpɑ i yĩsiru yɑri hɑnduniɑn bwesenu kpuron suunu sɔɔ sɑnɑm mɛ u koo kɑ bɛɛn yobu wurɑmɑ i bu wɑ. Wi, Yinni Gusunɔwɑ u yeni ɡeruɑ.