Cefaña 3

1

2

3

¹Wóoy ngalla fippukat bu sobewu bi, dëkkub notkat yi.

²Dégluwul baat, nanguwul kàddu guy yare, du Aji Sax ji la wóolu, du Yàllaam jooju la jege.

³Kàngam yi ci biiram di gaynde yuy ŋar, ay njiitam di tilli timis yu dul pannal,

⁴ay yonentam reew, diy workat; ay sarxalkatam teddadil sellnga, xëtt yoon.

⁵Ndaxam Aji Sax jiy boroom njekk a ngi ci biiram, te du def njubadi, jantoo jant mu fenkal ab àtteem, te du wuute fu bët sete. Ab wurujkat kay moo xamul gàcce.

⁶«Maa fàkkas ay xeet, seeni tata tasaaroo, ma wéetal seeni mbedd, ba kenn jaareetu fa, seeni dëkk a tas ba kenn desul, kenn dëkkatu fa.

⁷«Maa noon Yerusalem: “Xanaa moos dinga ma ragal, déggal ab yar.” Su ko defee dëkkuwaayam du tas, ndax mboolem mbugal yi ma ko dikke, waaye moo yàkkamtee ñaaw ci jépp jëfam,

⁸moo tax, xaar ma rekk,» kàddug Aji Sax jee, «ba keroog may jóg, nara sëxëtooji, nde maa dogala dajale xeet yi, dajale nguur yi, ngir xëpp leen samam sànj, mboolem sama tàngooru mer. Sama sawaras fiiraange déy, ci la mboolem àddina di xoyomu.

⁹«Su boobaa ma soppi làmmiñu xeet yi, setal ko, ngir ñuy tudd ñoom ñépp turu Aji Sax ji, di ko jaamoondoo benn bopp.

¹⁰Sama jaam ñi, sama ñoñ ñi tasaaroo, ca wàllaa dexu Kuus lañuy bawoo, ba indi samab sarax.

¹¹«Su bés baa gàcce dootul am ci sa mboolem jëf, ji nga ma moye, nde maay jële fi sa biir ñiy bége sab sag, te doo damooti ci sama kaw tund wu sell.

¹²Waaye maay wacc fi sa biir askan wu woyof te néew doole, ñu yiiroo turu Aji Sax ji.

¹³Ndesu Israyil dootuñu ayibal, dootuñu fen, deesatu leen déggal kàdduy wor, ñoom doŋŋ it ñooy for, di goor, te kenn du leen tiital.»

¹⁴Yaw janq Siyoŋ mu taaru, sarxolleel, Éey Israyil, xaacul, yaw janq Yerusalem mu taaru, bégal, te bànneexoo xol bu sedd guyy!

¹⁵Aji Sax ji moo teggi say mbugal, waññi sab noon. Buurub Israyil, Aji Sax jaa ngi fi sa biir, dootuloo tiit lu bon.

¹⁶Bésub keroog lees di wax Yerusalem, ne ko: «Yaw Siyoŋ, bul tiit, bul yoqi.

¹⁷Aji Sax ji sa Yàllaa ngi fi sa biir, di jàmbaar juy walloo. Moo lay bége ci biir bànneex, leqlee la cofeelam, bége la bay sarxolle.

¹⁸«Ñi amu naqar te sore ndajey bernde, ñooñu la sore, te tegoo woon gàcce, maa leen di dajale, teggil leen gàcce tey.

¹⁹Ma ne jant yooyu laay jëflanteek mboolem ñi leen di sonal. Ci laay wallu kuy sukkóot, fat ku tumurànke, may leen teraanga aku tur, fépp fu ñu ruse woon ci àddina.

²⁰Yeen, jant yooyu laa leen di indi, jant yooyu laa leen di dajale, nde maa leen di defal aw tur ak teraanga fi biir mboolem askani àddina, maay tijji seen wërsëg, ngeen gis.» Aji Sax jee ko wax.