1Nimizai ɠa kololala laai ʋɛ, kɔzɔai, é ga nu ʋaa laai!
2É la woiloni toligi ma, é la vaazu maaɠoloi wu, é la ɓɔɠɔ ɠalivaazu Ɠɔoɠɔ GALAGI ma, é la ʋoluzeizu ná-GALAGI ʋa.
3Ná-kundiɠiiti ti ná ta ga zalaiti ti zikɔzu, ná-tukpɔɠaaleʋe nuiti ta ga zuluɓuiti ti kpɛgi wosu kpidii, ti la tanɔpɛ makɛsu, ti ʋa mi sobui.
4Ta-ƓALA goo wo nuiti ti la ga totuɠɔ ʋagɔ, ta ga yaava nuiti. Ta-zalaɠa ɠula nuiti ti la unfema veezu aniiti bɛ ti veai GALA bɛ, ta ná-tɔgiti koloɠolosu.
5Anɛɛ naa ʋe, Ɠɔoɠɔ GALAGI ɠa ná, taazuʋɛ, é ɗa ɓɔɠɔ lɛ ga telebo nu ʋe, é la faa ɲɔu nɔpɛ kɛɛzu. Sobu-o-sobu, zeɠema la ba, toɠa ná-tukpɔiiti gaaleʋezu. Kɛlɛ faa ɲɔu ɠɛ nui la ɗa ga unfe pɛ.
6«Gè ziiti suwuɠaaleʋea, gè ti-velesuʋɛti suɠoloɠolo. Gè koi yɔɠɔzuʋɛti koloɠologa, nu nɔpɛ ge la mɔ ziɛzu náti. Ta-laa wolaiti suɲakai ɠɛ de, nu ɠila kpalaa ge la mɔ zeini ná.
7Kɛlɛ gè ɠɛni ma: ‹Ɗa unfe mà, è tɛnɛ gooi zo, naa ɠa a kɛ, è-zeizuʋɛ mina ɠoloɠolo.› Gè ti loɠani siɛ mɔinmɔin su, kɛlɛ ti ɠɛni ɠaazuvilɛzu ga faa ɲɔi ɠɛa, ti-ɠɛɛvai pɛ su.»
8Ɠɔoɠɔ GALAGI wooi ɠaa: «Naa ɠa é ba, à màaɓɔun, ungo, à naama voloi maaɓɔun, yeei gè ʋaazu wuzeɠezu la kɔɔzoganii vaa zu. Gè devea ga gè ziiti ta masadaiti gaalɛ ba, ga gè nà-ziiɠaawana wolai zei ti ma. Eteai pɛ ka ɠala ga nà-ziiɠaawana abui.»
9«Naazu nà nuɓusɛiti maavalibo, nà ti-lakɔlɔgiti ɲade, ta fàli, nɛ̀i gè ga Ɠɔoɠɔ GALAGI, ti pɛ ta dɛ̀bi ga yiimaʋɛ pɛ.
10Anɛɛ Etiyɔpi ɗɛ wolai ʋolu ʋele nuu, dɛ̀bi nui, niiti gè ti vazani, ta ʋa pɔ̀ ga ta-vebɛaniiti.
11Naama volo ná, nà-nuɓusɛiti, wo la mɔ unfega ga wo luʋa ʋeleiti faa, kotoi niiti wo ti ɠɛɛni dàalɔɠɔma. Nà naati pɛ kula wo zaama, zɔiti ti laavegai ga wasogi, wa ɓe niina waso fai ʋa nà-gize ɲadegai ma.
12Nà nuɓusɛiti makɛ wo zaama, ti ga ɓɔɠɔmaayei nuiti ta ti ʋalagai, ta ɠɛ velesu Ɠɔoɠɔ GALAGI ʋolu.
13Izelayɛle nuɓusɛi mɔtaiti ta ɠɛ vulua, ti la mɔ telebotala vaa nɔpɛ kɛa, ti la mɔ zɛɛ nɔpɛ boga, ti la mɔ yaava vaa nɔpɛ kɛa ga ti-laaʋɛ. Ta zoo ti daami wo, ti ɲiimɛni ʋagɔi wo, nu nɔpɛ ge la ti maalua.»
14Ee, Siyɔn nuɓusɛiti, à vuka ga koozunɛɛi! Ee, Izelayɛle nuiti, à ɠɔkɔ ga koozunɛɛi! Ee, Zeeluzalɛme nuɓusɛiti, à ɠoozunɛ ga wo-yiimaʋɛ pɛ!
15Ɠɔoɠɔ GALAGI peelala vai ma ɠasɔi zeɠea wo unma, é wo zili nuiti kpɛa wo ʋolu. Izelayɛle ná-masagi, Ɠɔoɠɔ GALAGI ɠa wo zaama, maa la mɔ nɛɛni wo ʋa lua maanɔɠɔ ʋa.
16Naama volo ná, ta ɠɛ Zeeluzalɛme ma: «À mina lua, Siyɔn nuɓusɛiti, wo iɲɔ ge mina leʋe pa!
17Mazɔlɔɔ Ɠɔoɠɔ GALAGI wa-ƓALAGI ɠa wo zaama, ga kɔɔɠɔ ɠuluɓai é wo ɠizosu. Toɠa wo ɠaanɛɛnɛzu ga ná-nɛɛbɛi, toɠa koozunɛ wuyei loo wa-vaa zu.»
18Maliɠii ɠɛ ma: «Nà maanɔɠɔ vaiti kpe wa-vɛti voloiti ba, niiti ti ɠɛa wo unma ga kasɔi ta zelilomai.
19Wɛlɛ, naama ziɛgi zu, nà vɔɔɠu naati pɛ ba, niiti ti wo zopele ɲɔuni. Nà naati balo, niiti ti lɛkpuzu, zɔiti ti loai ya, gè naati gaalɛ ba. Nà wo ɠɛ ga unfema nuiti, wo-lɔɠɔi ɠula zooiti pɛ su, ʋɛti unfegi zeelini wo ma náti.
20Naama ziɛgi zu, nà ʋa ga woye ʋolu, siɛgi zu gè wo ɠaalɛɛzu ba la ʋolu, nà wo-laaseigi wɔɔlɔ, lɛbiyai ɠɛ wo ʋɛ eteai zu nuɓusɛiti pɛ saama. Nà naa ɠɛ siɛgi zu, gè wa-vaiti maavalibosu da, wa ɓɔɠɔi wo ɠaazu.» Ɠɔoɠɔ GALAGI ɠa é boga.
