1Neggwebur-emar-sabsur-imaksiid, uayasuli-siid, nue-isgussiid. ¡Be duledar-wiles!
2Dule-ega-binsaed-daked itosulid, nabir-gudiguega ega-ibmar-soged, abesulid. We-dulemar Bab-Jehová-bened, e-Bab-Dummad amisulid.
3We-neggweburgi dule-dummagan-negsedimaladi, achumigur-nono-wawaad-uurmakdiiyob gudimalad. E-negsedimalad, igi achu-sapur-burburud mutikidba mas-gasale, gwen banedga mas sabosuli, deyobi damalad.
4E-Bab-Dummad-gayaburba-barsogmalad, na san-dummarba-imakmaladid, emar-yardakmaladid. E-dule-irwa-Bab-Dummadse-gormalad, neg-islidikidi oichodimalad. Bab-Jehová-Igar-Mamaidgi annadimalad.
5Dule, Bab-Jehová-e-dulamar-abargi-gudiiddi, igar-inniki-imakedid, ibmar-isgana imaksulid. Bane-bane wakudaryalaba e-igar-inniki-imaked imakdiid, bangi-oibosale, geg imaksuli gued. Dule-isganadina, gwen binged itosulid.
6Bab-Jehová soged: “Dule-yar-baid-baidgi-bukwamalad an obelosad, e-neg-matusurmalad an earisad. E-neg-imbamar dule-sate an imaksad, gwen bar dulemar egi nanasulid. E-neggweburmar napabi nagusad, e-dulemar bela girgusad.
7An binsanaigualid: ‘Jerusalén-dulemardi an-dobguoergebye, anba ibsaoergebye.’ Adi, deyobi, an e-neg-bukwadse ataknadele, e-negmar an oberguosurye. Degi-inigwele, aka Jerusalén-dulemar bur gwae-gwae ibmar-isgana-imakde gusmalad.”
8Agala, Bab-Jehová soged: “Degisoggu, an-bemargi-yolegega-danikoed-ibagi be an-abitomalo. Ar dule-yar-baid-baidgi-bukwamalad-onmakega an imaksokalid, bela-neg-selemamaid-atoega an imaksokalid, adi, an-bela-bela-sae-itogedgi wemar sabsur-odurdakega, an-bela-bela-urwedgi wemar sabsur-odurdakegar. An uludele, an sooyob gued, anse bela napneg ogumaklegoed.
9”Bela Bab-Jehová-nug-odummomalaga, bela bulakwaa Bab-Jehováʼga arbamalaga, an dulemar-e-gwabinduku swilidik imakoed.
10Etiopía-diwarmargi dikasur-daksik-bukwamaladi, an-nug-odummodimaladi, an-dulamar-aisakis-bukwamaladi, anga ibmar-ukleged senonimaloed.
11A-ibagine, be angi-yoledigusadgine, bar be bingeguosulid. Be-abargi dule-na-san-dummarba-imakdiid, dule-na-nuga-nikadga-imakdiid, an obelogoed. Deyobi, an-yar-islidikidgi, bar na san-dummarba-imakdii guosulid.
12Be-abargi unnila dule-wileganabi, dule-na-san-dummarba-imaksurmaladbi, an obegoed. Wemar unnila Bab-Jehováʼgi bensurgudii gumaloed.
13Israel-dulemar-napi-bemaloedi, ibmar-isgana imakosurmalad, bar gakansaosurmalad, bar emar-yardakosurmarbalid. Unnila nuedgi mas-gundii, dobsulidgi obunnodii gumaloed.”
14Ani an Sofonías bega sogmalad: “Sión-dulemar, weligwar-itogedba be iseed gormala, Israel-dulemar, nakwisadba be oimakmala. Jerusalén-dulemar, gwage-ulubgi be yeer-itomala, be wergumala.
15Bab-Jehová bar sabsur be-imakosulid, Bab-Jehová be-isdarmalad gannar sorsik-duurmakega imaksad. Israel-e-rey-Bab-Jehová, bemar-abargi gudiid. Bar be ibmar-isgana dobguosurmalad.
16A-ibagine, Jerusalén-dulemarga sogdemaloed: ‘Sión-dulemar mer be dobgumarye, gandik-imakmarye.’
17Ar be-Bab-Dummad-Jehová bemar-abargi gudiid. Ar Bab-Jehová dule-bila-onoged-nakwisad gued. Ibamargineyobi, Bab-Jehová begi weligwar itogoed. Gannaryobi e-sabgued bega oyogoed,
18be-nuggine weligwaledba namakoed.” Bab-Jehová soged: “Wile-itogedgi an be-ollor-imakoed, ar we, bingedar-itoge be imaked.
19A-ibagine, an-sunnagwad dule-mesagwar-be-imakdimalad an obelogoed. Sibad-wawaad-yaku-yaku-nanaed an bendakoed. Sibad-wawaad-yoggus-gudiid gannar an sedagoed. Ibi-yarmargi be bingegudii gusmala, agi an be-nug-odummomaloed, agi nuga-nikamaladga an be-imakmaloed.
20A-ibagine, an bemar-senonikoed, an bemar-onmaknonikoed. An bemar-wagab, be-dule-galesbukmalad an gannar senonikile, bela dulemar-we-napneggi-bukwamalad-abargi, an be-nug-odummomaloed. Nuga-nikamaladga an be-imakmaloed.” Bab-Jehová deyob soged.
