3Sikavelas lenge andral o Devleskero Lav, hoj te achaľon, hoj o Kristus mušinďa te cerpinel a pro trito džives te ušťel andral o meriben. Phenďa: “Oda Ježiš, pal savo me tumenge vakerav, hin o Kristus.”
4Varesave lendar pačanďile a pridine pes ko Pavol the ko Silas. Lenca pačanďile mek but Greki, save pes daranas le Devlestar, the but anglune džuvľa.
5Ale o hamišne (žarľive) Židi peske ile pal e uľica varesave živaňen, hoj te maren upre le manušen the calo foros. Gele pro Jasonoskero kher a kamle te anel le Pavol the le Silas anglo nipi.