1Chi badxin Jesús con ree xbejnman zatiblad roꞌ nijsdoo guin, xdajn ree bén Gadara,
2baguiajtzi Jesús loj barcw guin, tijb xin yuꞌ xindxab luxdoo bigchaaglojx Jesús. Bariix roꞌ ree baa,
3guial nabanx ni. Achutczi rajc rixhii laax niꞌqui con caden.
4Zien volt ma guxhii reeman yaax në guiaꞌx con caden, per rüjngajquix gan rurooxix laan. Achut rüjn laax gan.
5Dxejz guiaal rizax niz dajn con la̱d ree baa, rbixdiajx rguiilguijdx laagajquix con guiaj.
6Zijtri baguiaax Jesús, baxüünx bigchaaglojx laaman abiꞌ bazuxibix lojman.
7Zianz guneex rejs rëbix: ―¿Xhie rënl con naj Jesús, Xiꞌn Dios yuꞌ xanyabaa? Rniaaban lojl ad gusagzil naj.
8Rëbix zian, guial cayëb Jesús lojx: ―¡Xindxab, barii luxdoo xin guin!
9Dxel gunabdiidx Jesús lojx rëbaman: ―¿Chu lal? Badxiꞌxan rëbix: ―Legión lan din zien nayajcan.
10Abiꞌ rëbix lojman chitëë guixhiaalaman xindxab guin ree lood ren.
11Abiꞌ gajxh yagaj rigaꞌ zien ree cüch cayaw reeb.
12Zianz rëb ree xindxab guin loj Jesús: ―Guxhaal dunujn lod zaꞌ ree cüch guin din yadxuꞌn lën reeb.
13Dxel cwëjb Jesús barii ree xindxab guin luxdoo xin guin persi bayu reex lën ree cüch guin. Cost tioꞌp mil na̱j reeb. Dxel guzuloj cuxüün reeb, zianz bitidyaꞌ reeb roꞌ balaꞌ xt lojnijs, lod guꞌ reeb nijs zianz güjt reeb.
14Guiáad ree bén cayajp laa reeb, baxüün reeman bicojn reeman luguiedx në ree dajn abiꞌ zien ree bejn wej biquiaa ni goc.
15Chi bidxin reeman lod zaꞌ Jesús, baguiaa reeman xin barii xindxab guin ree luxdoo, zojbix najcw xabix, ma badëdguienx. Abiꞌ bidxeb reeman.
16Guiáad ree bén baguiaa gra ni goc con xin guin, në con ree cüch guin, be reeman diidx loj ree bén bidxin.
17Dxel guzuloj rëb reeman loj Jesús din yazaman niz ladx reeman.
18Chi bayu Jesús loj barcw guin, naguiejn rüjn xin barii xindxab guin ree luxdoo din chinalix laaman.
19Per ad cwëjbt Jesús, rëbaman: ―Baguiaj lidxil, bignaj xfamilil, biguie diidx loj reeman gra ni ma been Dios por lüj, xhie tëë naag bayaman lüj.
20Dxel ziax, guzuloj rëbix loj ree bén zojb niz Decápolis gra ni been Dios por laax, abiꞌ graczi reeman badxaloj.
21Chi badxin Jesús loj barcw stiblad roꞌ nijs guin, dád zien ree bejn bidoꞌp, persi roꞌzi nijs guin bayaꞌnman.
22Dxel bidxin tijb bén rniabee lën tijb xyadoo ree bén Israel, laman Jairo. Chi baguiaaman Jesús, bazuxibaman lojman,
23abiꞌ guzajcaman laaman liaadx, rëbaman: ―Ma cayëjt da xiꞌnan. Yoꞌsii din gudxiib yaal guijquim din yayajquim din guibanm.
24Zinët Jesús bén guin, dád zien bejn zinal laaman xt rixaꞌt reeman laaman.
25Loj graczi reeman noꞌch tijb béngunaa, ma gojc chiptioꞌp ijz ragxuuman ryajbaman rejn.
26Dád ma guzagdiajman, ma banijt graczi ni rajpaman guial wejman loj ree doctor, per ad bayajctaman, aal mazri zroꞌ rajcaman.
27Chi biguiejnman gra ni rüjn Jesús, gudëdaman la̱d ree bén guin, gubigaman niz xijchaman dxel bagaalaman xabaman.
28Guial gunaladxaman: “Gugalzan xabaman, ma bayajc gajcan.”
29Loj hor zii gajc gulëjz biajbaman rejn, abiꞌ gogbeeman ma bayajcaman.
30Laa gogbee gajc Jesús guial yuꞌ chu ma bayajc por xguialrniabeeman, abiꞌ badxiꞌ lojman loj ree bén guin dxel gunabdiidxaman, rëbaman: ―¿Chu baquiꞌ da xaban?
31Abiꞌ rëb ree xbejnman lojman: ―Awa ruguiaal xt rixaꞌt reeman lüj guiáad lüj rniabdiidxil chu baquiꞌ xabil.
32Per Jesús ruguiaaman gra lad din guguiaaman chu baquiꞌ laaman.
33Abiꞌ guidib rnij béngunaa guin guial rdxebaman, guial gogbeeman ma bayajcaman, bigzuxibaman loj Jesús, beman diidxli ni beenman.
34Dxel rëb Jesús lojman: ―Xiꞌn, guial bililadxil naj zeel ma bayajquil. Baguiaj zagdxe. Ma bayajquil guialguijdx ni goquil.
35Sta canee Jesús zian, chi bidxin ree bén guza lidx Jairo, rëb reeman loj Jairo: ―Ma güjt xiꞌnl. Ad ruslenril mextr guin mazri.
36Per chi biguiejn Jesús ni rëb reeman, rëbaman loj Jairo: ―Ad rdxebil, bililadxzi naj.
37Ad cwëjbt Jesús ninal gra ree bén rigaꞌ laaman, Bëdzi, con Jacob, con Waj bijch Jacob.
38Chi bidxin reeman lidxaman, baguiaa Jesús cayajc naquieꞌ guial roon rbixdiaj reeman.
39Dxel guyuman lënü abiꞌ rëbaman loj reeman: ―¿Chexc zeel roon rbixdiajdi? Ad güjttim, nagaꞌyëjsim.
40Per bazeꞌ reeman laaman. Dxel gunabeeman barii gra reeman, zianz binëman xdadim con xniaam con ree bén zinëman, lod nagaꞌ bindo guin.
41Dxel gunaazaman yaam rëbaman: ―Talita, cumi ―Rën guiëban: Lüj rnin, bindoo, bixche.
42Loj hor ziigajc bixchem guzuloj cazam. Yuꞌm chiptioꞌp ijz. Abiꞌ dád badxa loj ree bén rigaꞌ.
43Per gunabee Jesús laa reeman chitëë chu loj guiëb reeman ni goc, gunabee tëëman gudëëd reeman ni gawim.
