1Go Hana keteŋ nê mec amboac tonec gebe “Ŋoc ŋalêlôm kêtu samuc Apômtau aê têtac kêpa su kêtu Apômtauŋa. Aê aocsuŋ kêsu ŋoc soŋo-soŋo susu gebe aê katu samuc kêtu aôm gôjam aê saŋa.
2“Ŋac dabuŋ teŋ kêtôm Apômtau gêmoa atom. Apômtau teŋ gêmoa atom, aôm taômgeŋ. Lamuanô teŋ kêtôm aêacma Anôtô gêmoa atom.
3Asôm biŋ tembelem aŋgeŋ teŋ êtiam atom. Biŋ atoc taôm saŋa êsa awemsuŋ atom, gebe Apômtau eŋ Anôtô kêjala gêŋŋa ma eŋ gêjam dôŋ ŋamalac nêŋ kôm.
4Lau ŋactêkwa nêŋ talam tulu, mago lau palê-palê sêjandiŋ ŋaclai sa.
5Êsêac taŋ sêŋgôŋ nêŋ masê ŋaô su naŋ, sesom kôm gebe têtap gêŋ sêniŋŋa ŋagec-ŋagec sa. Ma êsêac, taŋ gêŋ gêjô êsêac su naŋ, galoc gêŋ gêôc êsêac tôŋ. Awê kapoac kêkôc ŋapalê 7, mago awê, taŋ kêkôc gôlôac taêsam naŋ, nê ôli kêmêliŋ.
6Apômtau gêjac êndu to gêŋu mata jali kêsa. Eŋ gêwê lau sêsêp lamboam sêja ma gêwê êsêac sêpi sêmêŋ kêtiam.
7Apômtau kêkêŋ lau ŋagêdô têtu lau ŋalêlôm sawa ma ŋagêdô lau tolêlôm. Eŋ kêkôniŋ ma ketoc sa.
8Eŋ kêsip lau ŋalêlôm sawa sa aŋga kekop ma gêôc lau sêpô lênawaga sa aŋga waomôkê, gebe kêkêŋ êsêac sêŋgôŋ sêwiŋ gôliŋwaga towae ma sêwê kaiŋ lêpôŋ tetoc lau saŋa. Gebe Apômtau kêtu nom ŋaalê ŋatau ma kêkwê nom kêkô alê tau ŋaô.
9“Eŋ oc ejop nê lau dabuŋ eŋkaiŋ, mago lau alôb-alôb oc sênaŋa sêmoa ŋakesec ŋalêlôm gebe ŋac teŋ etoc tau sa êtu tau nê ŋaclaiŋa atom.
10Apômtau oc êtuc nê ŋacjo popoc ma Lôlôc Ŋatau êkêŋ wapap ênac aŋga undambê. Apômtau oc êmêtôc nom e naêndêŋ ŋamadiŋ. Eŋ oc êkêŋ ŋajaŋa êndêŋ nê kiŋ ma oc etoc nê ŋac-geŋ-oso-eŋwaga nê ŋaclai sa.”
11Go Elkana gêmu gêja nê malac Rama kêtiam gêwiŋ nê gôlôac samucgeŋ, ma ŋapalê tau gêjam sakiŋ Apômtau gêmoa dabuŋwaga Eli laŋônêmŋa.
12Eli latuagêc sêgôm gêŋ wauc-waucboa, êsêagêc sêwi Apômtau auc.
13Ma sêgêli ŋagôliŋ dabuŋwagaŋa amboac tonaŋgeŋ. Gêdêŋ taŋ ŋac teŋ kêkêŋ da gêmoa naŋ, dabuŋwaga nê sakiŋwaga mêŋgêô lasê tosala ŋamata têlêac.
14Bôc tau eletoc êmoa, go êsêli sala êsêp ku me pane me laclu me kuki. Gêŋ samob, taŋ sala kêsêp naŋ, êtu dabuŋwaganê gêŋ. Êsêac sêgôm amboac tonaŋ gêdêŋ lau Israel samob, taŋ sêkêŋ da aŋga Silo naŋ.
15Mago gêdêŋ Eli latuagêc nêŋ têm, gêdêŋ taŋ ja geŋ ŋalêsi atomgeŋ naŋ, dabuŋwaganê sakiŋwaga mêŋgêô lasê ma kêsôm gêdêŋ ŋac, taŋ kêkêŋ da gêmoa naŋ, gebe “Ôkêŋ dabuŋwaganê bôc êndêŋ aê gebe japac sigobgeŋ. Eŋ gebe êkôc bôc senoŋa teŋ aŋga aômnêm atom, gebe êkôc bôc matacgeŋ.”
16Ma ŋac tau embe êsôm êndêŋ eŋ gebe “Ja êniŋ ŋalêsi su acgom, go ôkôc êtôm têmtac êwiŋ”, go sakiŋwaga asôm gebe “Masianô, galocgeŋ ôkêŋ, ma embe masi, go Jajaŋgo su.”
17Apômtau gêlic lau wakuc naŋ mêtê sec samucgeŋ gebe sêsu Apômtaunê da susu.
18Ŋapalê Samuel gêjam sakiŋ Apômtau gêmoa. Eŋ kêjandiŋ obo sakiŋŋa teŋ.
19Katôm jalageŋ Samuel têna kêsi ŋakwê ôliŋa sauŋ teŋ kêtu eŋŋa. Ma gêdêŋ taŋ êsêagêc nê akweŋ sêpi sêja gebe sêkêŋ da naŋ, eŋ kêkêŋ ŋakwê tau gêdêŋ Samuel.
20Go Eli gêjam mec Elkana agêc nê awê ma kêsôm gebe “Apômtau êkêŋ awê tonec êkôc nêm ŋapalê sêjô ŋac, taŋ kêkêŋ gêdêŋ Apômtau naŋ su.” Go agêc sêmu sêja nêŋ gamêŋ kêtiam.
21Ma Apômtau taê gêjam Hana ma eŋ kêkôc ŋapalê ŋac têlêac ma awê luagêc. Ma ŋapalê Samuel kêtu kapôêŋ gêmoa-Apômtau laŋônêmŋa.
22Eli kêtu ŋamalacanô su ma gêŋô latuagêc nêŋ biŋ samob, taŋ sêgôm gêdêŋ lau Israel naŋ, to sêgôm mockaiŋ gêdêŋ lauo, taŋ sêjam sakiŋ aŋga katam lôm becŋa naŋ.
23Ma kêsôm gêdêŋ êsêagêc gebe “Amagêc agôm gêŋ amboac-tonaŋ kêtu asageŋŋa. Gebe aê gaŋô lau samob sêsôm amagêc nêm gêŋ alôb-alôb ŋawaegac.
24O latucagêc, awi siŋmaŋ gebe aê gaŋô Apômtaunê lau sêsôm amagêcnêm lêŋ ŋawae ŋajam teŋ atom.
25Ŋac teŋ embe êŋgôm ŋac teŋ sec, Anôtô oc êmêtôc gêŋ tonaŋ. Mago ŋac teŋ embe êŋgôm sec êndêŋ Apômtau, asa oc êtôm gebe eteŋ êtu ŋac tonaŋŋa.” Tageŋ êsêagêc sêkêŋ taŋeŋ tameŋi awa atom, gebe Apômtau taê gêjam kêtu tôŋ gebe ênac êsêagêc.
26Samuel kêtôp kêtu kapôêŋ gamoa ma Apômtau to ŋamalac têntac gêwiŋ eŋ.
27Go Anôtônê ŋac teŋ gêdêŋ Eli gêmêŋ ma kêsôm gêdêŋ eŋ gebe “Apômtaunê biŋ tonec gebe ‘Aê gaoc tauc lasê gêdêŋ nêm miminê gôlôac gêdêŋ taŋ sêmoa Aiguptu sêsô Parao to nê gôlôac ŋalabu naŋ.
28Aê kajaliŋ eŋ sa aŋga Israel samob nêŋ gôlôacmôkê gebe êtu ŋoc dabuŋwaga. Eŋ êpi êndêŋ ŋoc altar êna gebe ênsôb jadauŋ ma êsô ŋakwê dabuŋ êkô aê laŋôcnêmŋa. Ma aê kakêŋ lau Israel nêŋ daja samob gêdêŋ miminê gôlôac.
29Kêtu asageŋŋa aôm matam katu ŋoc daja ma da samob, taŋ kajatu sa naŋ. Kêtu asageŋŋa aôm kotoc latômagêc sa kêlêlêc aê su naŋ, e alôm taôm ŋa da, taŋ ŋoc lau Israel sêkêŋ naŋ, ŋagêŋ mataêjamgeŋ.’
30Kêtu tonaŋŋa Apômtau, Israelnêŋ Anôtô, kêsôm gebe ‘Aê gajac mata su gebe nêm gôlôac to tamamnê gôlôac sêsô-sêsa aê laŋôcnêm endeŋ tôŋgeŋ.’ Mago galoc Apômtau kêsôm gebe ‘Biŋ tonaŋ ênêcŋa. Lau taŋ tetoc aê sa naŋ, aê oc jatoc êsêac sa ma êsêac, taŋ sêpêc gêdô aê naŋ, oc jalic êsêac amboac gêŋ ŋaôma.
31Ôlic acgom, bêc oc mêŋêô lasê, naŋ jasap aômnêm ŋaclai to tamamnê gôlôac nêŋ ŋaclai su e ŋamalacanô teŋ êmoa nêm gôlôac ŋalêlôm êtiam atom.
32Êndêŋ onaŋ oc ôsala moasiŋ, taŋ jansêwa êpi lau Israel naŋ, tomatam katugeŋ, ma ŋamalacanô teŋ oc êmoa nêm gôlôac ŋalêlôm êtiam atom endeŋ tôŋgeŋ.
33Aômnêm ŋac tageŋ aê jatiŋ eŋ su aŋga ŋoc altar atom, eŋ êmoa gebe êtaŋ tomatasulugeŋ e têkwa êmbac-êmbac to nê ŋalêlôm ôluŋ-ôluŋgeŋ. Mago ŋamalacnêŋ siŋ oc enseŋ nêm gôlôac nêŋ lau wakuc su.
34Gêŋ taŋ êtap latômagêc Hopni agêc Pinehas sa naŋ, êkêŋ puc aôm gebe êsêagêc lulugeŋ oc sêmac êndu bêc tageŋ.
35Ma aê oc jakêŋ taucŋoc dabuŋwaga ŋaŋêŋ teŋ. Eŋ oc êŋgôm geŋ êtôm aêŋoc taêc gêjam to ŋoc ŋalêlôm. Aê oc jakwê ênê andu teŋgeŋŋa teŋ sa ma eŋ êsêlêŋ êsô-êsa êmoa ŋoc ŋac, taŋ gaeŋ oso eŋ naŋ, laŋônêmŋa endeŋ tôŋgeŋ.
36Ma nêm gôlôac ŋapopoc samob oc sêndêŋ eŋ sêna ma teteŋ eŋ êtu moni me polom teŋŋa ma oc sêsôm gebe “Aê jateŋ aôm gebe ôkêŋ kôm sakiŋ dabuŋŋa teŋ êndêŋ aê gebe janiŋ polom ŋapopoc ŋagecmaŋ.” ’”
