1Kanan Hanna ay nankararag, “Palaloy layad ko begew en Diyos Apo! Tan inmipangato ya indawat nay bikas ko. Mabalin ay siyekak din kalaban ko, maragsakanak tan tinmolong si Diyos Apo.
2Magay nasantoan ay kaman din Diyos tako, maga polos di makaiso. Magay odom ay komakaman ay pankamangan tako mo adi et si Diyos Apo.
3Adi kayon palpalaloan san panlaslastogan yo, isaldeng yo san natangsit ay panagkalkali yo. Tan si Diyos ay makaammo si amin et okomena amin ay inam-amag di ipogaw tet-ewa.
4Din napipigsa ay soldado et magotlo din pana da, ngem din nakapsot et pomigsa da.
5Din mansobsobra ed idi si kanen da, makilagbo dad wani ta mangan da. Ngem din madagdagaangan ed idi et laton da ed wani. Din basig et nakaanak si pito da, ngem din ina ay ad-adoy anak na et nataynan ay magay olay esa.
6Si Diyos et ena peslen ya biyagen, ipababa nay ipogaw sin kad-an di natey ya kasinan tagoen.
7Waday pabitegena, waday pabaknangena, waday ipababa na, wada abey ipangato na.
8Din nababa ya kaseseg-ang di kasasaad da, et ipangato na ya kaanenan kaibabainan da. Pakitokdoenas daida sin ipogaw ay way banol na, et nangato ay turay di pangisaadana en daida. Din naisaadan di lobong, si Diyos di akin oka, sisya di nangisaad isnan daga.
9Ay-ayowanana din biyag di ipogaw na, ngem din managbasol et sin mabolinget ay kad-an di natey di panturongan da, tan adi mabalin ay matago di ipogaw si bokbokod na ay pigsa.
10Dadlon abaken Diyos din kalabana, tan kaman kido ay mapod daya ay bomaba sin kad-an da. Kadi et okomena am-in ay ipogaw isnan daga. Idawtanas panakabalin din ari ay pinili na ta say sisya di pangabakena.”
11Idi makdeng di, sinmaas da Elkana ed Rama, ngem nataynan si Samuel ay anak da ed Shilo ta mansilbi en Diyos sin babaen Eli ay padi.
19Tinawtawen ay man-amag si Hanna si nagayad ay bado ay idawat nan Samuel mo maikoyog en asawa na ay man-idaton sin idatdatonas tinawtawen.
20Pag bindisyonan Eli da Elkana ay sin-asawa yan kanana, “Sapay koma ta idawtan Diyos dakayo sin asawam ay nay si odom ay anak ay kasokat din indaton yo ay nay ay mansilbi en sisya.” Makdeng pay di yan sinmaa da.
21Pag bindisyonan tet-ewan Diyos si Hanna et indawtanas tolo ay anak ay lalaki ya dowa ay babai. Mo si Samuel pay et nadakdakdake ay mansilsilbi en Diyos.
26Nasepsep abe ay laylayden Diyos ya din kaipoipogaw sisya.
