Sam 49:6-20

⁶sapu sari na tie kaleadi pu kalavarae puleni koari na dia tinagotago, meke va lavata puleni koari na dia likakalae sokudi.

⁷Lopu boka holu pule nia telena sa tie, lopu boka tabaria sa koe Tamasa sa hinoluna sa nana tinoa.

⁸Ura sa hinoluna sa tinoa tana tie si noma sisigiti, meke gua sapu boka tabaria sa pude boka toa hola si asa pa pepeso si lopu garogaro.

¹⁰Gilania gita sapu sari na tie tumatumaedi ba mate tu, kekeṉoṉo gua tugo mo ari na tie duviduvilidi na tie pekipekidi. Mate luara vekoi mo rini koari na turaṉadia sari na dia tinagotago.

¹¹Be guana ari dia pepeso soti si arini pa kasia popoa hie, gua si arini, ba sari na lovudi mo si na dia vasina soti, vasina si kaqu koa rini osolae kamoa na kamoa.

¹²Lopu boka govete nia keke tie sa minate, ura kaqu mate gua tugo ri na kurukuru si asa.

¹³Ba be va lavati ri kaiqa si arini koari na dia zinama vinahesi puleni, ba sa lovu tu sa vinabetona sa tinoa tadirini pu kalavarae puleni pa dia tinagotago.

¹⁴Guana sipi tava nama pude mate sa dia tinoa, meke na minate tugo sa dia sepati kaqu gore toṉoto la pa lovu sarini, meke lopu sana kaqu muzi palae sa tinidia. Kote koa si arini pa popoa tadi na tie matedi seu koari na dia vetu, ba sari na tie toṉoto si kaqu koa mataqara hola koa rini.

¹⁵Ba kaqu harupu pule nia Tamasa sa qua tinoa koasa ṉiniraṉira tanisa minate.

¹⁶Mu lopu talotaṉa nia be ta evaṉae tagotago si keke tie, meke be noma hola lala nana sa nana tinagotago!

¹⁷Ura pana mate sa loketoṉa si kaqu paleke taloa nia sa pa lovu. Loke tinagotago si kaqu paleke la nia sa pa lovu.

¹⁸Be guana qetuqetu sa tie pa nana tinoa soti, meke tava lavata si asa sina koa valeana,

¹⁹ba kaqu luli la i tugo sa sari kasa tiatamana pukerane pa minate. Vasina lopu hite ta dogoro sa kalalasa.

²⁰Lopu boka govete nia keke tie sa minate, ura kaqu mate gua tugo ri na kurukuru si asa!