Psalms 49:6-20

⁶Nuna nunga mel suen biya wore te ira sanamasan, ale nunga manga bibiya wore te nunumi patawusan.

⁷Bare ali kari bo ta, bo ko dora kumik dia taukko me terong; agi nu kota numi manga te Kaem kote dia taukko me terong tala.

⁸Mu awuk, kariimet bo ko dora diara mu ko koma kalel aromemek; manga ta, anapeya ta te, wore me terong la.

⁹Kari bo ikiok numi manga te diaruk ale me kua iwi namaruk, marak pempem bagarukko i mauk wore ko, mu mena.

¹⁰Ana ikisan, kariimet ikia sinar karogo ta wore kuesan tala; se kariimet ikia sinar mena se ngualara mu koma suanta kuesan, ale nunga manga se mel ningo ningo mu betesan se kariimet saki no maguwusan.

¹¹Mungkala mu nuna nunga ali bibiya karogo, bare aitak mu nononga ali motam gotek te aniwasan umutang nunga ali sor ko pempem anirukko.

¹²Kariimet nunup biya mel suen biya karogo ta, wore me marak baga lagasan; nuna buruk kausik kua iwi namasan uwutatala, kua iwi namasan.

¹³Aninga sinar den imi ikialko: Kariimet nongota nunga ikia ningo masan ale te ira sanamasan, se kariimet saki nunga ikia umu karo tui gilingisan,

¹⁴mu nuna sipsip iwita, se kuera mateng mu nunga bitua kari iwita nunga bitarso, ale nongorak mutim ningi kapa naguso, se nunga kawam digo mel ningo ningo betesan ale kua iwi namasan; se kariimet ningo diram mu turomola nunga ira kalakumu nama taisan.

¹⁵Bare Kaem ani kuera mutim ningi aga sangaru tauk, se ani nu ilak pempem marak bagarikko.

¹⁶Buta se, awiriya kumik manga mel suen biya, se ko kawam ningi bala mel suen biya, bare bo bo karogo am giwuruk se arik, mu ni me ko gemang dagulokko.

¹⁷Mu awuk, maingte nu kueruk mu mel bo giok ale karogo me namarukko; noko mel ningo ningo mu giok ale karogo mutim ningi me kaparukko tala.

¹⁸Tom nu marak baga se mu, nu ko melmasak mu ko amilmil bitakaso, se kariimet balukasan nu kari yawara makasan.

¹⁹Bare nu kuera ko sor, ko nuet nongotak te kapaman, mu te kaparukko, ale sor nikim me arigokko.

²⁰Ikialko. Awiriya kumik mel suen biya karogo, bare nu kumik ikia sinar ningo mena, mu nu mel diwang bo iwita kua iwi namarukko.