Pesalem 49:6-20

⁶Lau sec taêŋ kêka nêŋ awageŋ to tetoc tauŋ sa kêtu nêŋ waba taêsamŋa.

⁷Ŋamalac teŋ êkêŋ gêŋ ênac da tau êŋgôm êtôm atom ma eŋ êkêŋ ŋaôli êsi tau suŋa êndêŋ Anôtô oc êŋgôm naeo amboac tonaŋgeŋ.

⁸Gebe katuŋ ŋaôli (gebe tamoa mateŋ jali ŋaôli) kapôêŋ secsêga, ŋac teŋ êtap sa êtôm atomanô.

⁹Eŋ embe taê ênam gebe ênac da tau e êmoa mata jaligeŋ ma êsêp sê atom oc êŋgôm êtôm atomanô.

¹⁰Aêac talicgac gebe laumêtê sêmac êndu ma lau meloc to kaucmê sêjaŋa amboac tonaŋgeŋ. Ma êsêac oc sêwi nêŋ waba siŋ naelom lau teŋ sêkôc.

¹¹Lau tonaŋ sê nêŋ ŋaê kêpi nom ŋagamêŋ ŋagêdô, mago nêŋ sê kêtu nêŋ malacmôkê, kêtu nêŋ andu totêm-totêm.

¹²Biŋŋanô, ŋamalac tonê gêlôŋgeŋ, tec êmoa nê teŋgeŋ atom. Eŋ kêtôm bôc, taŋ ênaŋa naŋ.

¹³Lau taŋ taêŋ kêpa tauŋ su naŋ, ma êsêac, taŋ sêkêŋ gêwiŋ êsêacnêŋ biŋ ma oc têndaŋguc êsêac naŋ, nêŋ lêŋ kêtôm tonaŋgeŋ.

¹⁴Êsêac têdênaŋ tauŋ têtôm domba gebe lamboam gêwê kaiŋ êsêac. Gêmac anô kêtu nêŋ ŋacgejob.

¹⁵Ma Anôtô oc ênam ŋoc katuc kêsi aŋga lamboam ŋaŋaclai gebe eŋ oc ênam aê kêsi.

¹⁶Amboac tonaŋ embe ôlic ŋac teŋ nê awa êtu taêsam ma nê andu ŋagêŋlêlôm ênsac tau ŋaô-ŋaô, naŋ têmtac sec atom,

¹⁷gebe eŋ embe êmac êndu, oc êkôc gêŋ samob tonaŋ ŋai ŋateŋ êna atom. Ênê gêlôŋ ŋawasi oc êwiŋ eŋ êna atom.

¹⁸Eŋ embe êlambiŋ tau gebe êmoa ŋajam aŋga nom ma lau embe sêlambiŋ eŋ gebe kêtap nê kôm ŋanô taêsam sa,

¹⁹oc ênam eŋ sa atom, eŋ naêndêŋ tamai to nêŋ lau ŋanô, taŋ sêlic oc ŋawê kêtiam atom naŋ.

²⁰Biŋŋanô, ŋamalac tonê gêlôŋ oc êmoa teŋgeŋ atom. Eŋ kêtôm bôc, taŋ ênaŋa naŋ.