Sam 38:2-12

²Ele tava bakora si rau koari na Mua tupi, meke ele seke nau limamu Goi.

³Ta sigiti hola si rau, sina koa gua koasa Mua binugoro, moho sa doduru tiniqu koari na qua sinea.

⁴Lodu mate si rau koari na qua sinea, guana keke pinaleke mamatana hola si arini koa rau, sapu lopu boka paleki rau.

⁵Muzi meke humaṉa hikare sari na bakoraqu, ura kaleana hola sa qua dinuviduvili.

⁶Ene koqoho si rau sina gigiri sa qua tinasigiti, kabo alili si rau doduru rane.

⁷Maṉini hola sa tiniqu meke tata mate qua.

⁸Ta naqoto gore si rau meke loke qua ṉiniraṉira hokara; silava si rau sina koa pa tinasuna sa maqomaqoqu.

⁹Ke Baṉara, sa qua inokoro nomana pude ta salaṉa si gilania Goi. Bakala koa Goi sa qua tinasigiti.

¹⁰Duṉaduṉana sa buloqu, na malohoro si rau, meke rida tugo sari na mataqu.

¹¹Sari na qua baere na turaṉaqu si lopu hiva tata mae au, sina koa gua koari na tubuqu, meke sari na turaṉaqu soti ba turu va seu dia koa rau.

¹²Arini pu hata au pude va mate au si sekesekei nau rini. Arini pu hiva vata sigitau si sekesekei nau pude ṉoṉovalau, meke lopu makudo hatihati au rini pude raza au gua.