SALMOS 38:2-12

²Miyac nechcocohua tlen ax cuali nijchijtoc. Eltoc queja nochi mocuatlaminhua calactoc ipan na. Quena, eltoc queja tinechajsitoc, pampa nijmati ticualani nohuaya.

³Huan pampa ticualani pampa nitlajtlacolchijtoc, nijmati queja nochi notlacayo mococohua. Niyon se noomiyo ax cuali eltoc.

⁴Nochi notlajtlacolhua nopan huetztoc. Eltoc queja nimisahuisquía campa miyac atl. Notlajtlacolhua eltoc queja se tlamamali tlahuel etic tlen ax hueli niquijiyohuía.

⁵Palani notlacayo pampa nijchijqui se huihuiyotl. Mijyotíaj nococohua.

⁶Nicuitlapanhuitoltic huan ax hueli nijtlalana notzonteco. Semilhuitl nichocatinemi ipampa tlen nijchijtoc.

⁷Nochi notlacayo tliquisa. Huan ya tlantinemi nochicahualis ipampa notlajtlacol.

⁸Nimomati queja nitlatejtetzontli. Niyon quentzi fuerza ax nijpiya. Nelía niayijtía ipan noyolo.

⁹NoTeco, ta tijmati queja nijnequi sampa niitztos cuali moixpa. Nochi tlen nimoilhuía nempa nesi moixpa. Ax tleno hueli nimitztlatilía.

¹⁰Noyolo nelhuihuipica, huan ya tlantinemi nochicahualis. Ayoc hueli nitlachiya cuali.

¹¹Nonelhuampoyohua huan noteixmatcahua san nechhuejcaitaj, pampa quiijiyaj nococohua.

¹²Inijuanti tlen quinequij nechmictise quisencahuaj tlaquetztli para nechmasiltise. Tlen quinequij nechcocose ajachica nechilhuíaj quejatza nechtzontlamiltise. Semilhuitl quitemohuilíaj quejatza nechcajcayahuase.