Sam 36:1-8

¹(Keke kinera te Devita) Na sineke tinarae si solere pa bulodia rina tie va gugue, gua asa ke etulia meke loke dia pinamaṉa koe Zihova.

²Ura va lavata pule nia si asa, meke balabala ia sa sapu lopu kaqu pohoi e Zihova sari na kinaleadi meke va kilasia, gua.

³Tale kaleadi na kokoha mo sari na nana zinama, lopu boka vilavilasa valeana na tavete valeana si asa.

⁴Pana eko magogoso sa si kuhana nia mo sa si pude ṉoṉovala. Loke nana tinavete si hite leadi, meke lopu hite hakohako nia sa sa kinaleana.

⁵Kei Zihova, sa Mua tataru nabuna si lopu boka ta pada, meke sa kinopudi rina Mua vina tatara si loke kokoina.

⁶Sa Mua tinoṉoto si turu va nabu na ululu gua rina toqere, meke lopu boka ta pada sa Mua vinilasa guana lamana peava. Kei Zihova, na tie meke na kurukuru ba koa pa Mua kinopu.

⁷Kei Tamasa, nake arilaena tu sa Mua tataru nabuna. Va aqoro gami Goi si gami, guana kurukuru pu va aqori sari na tuna pa kauru tatapuruna.

⁸Henahena valeana si gami sina soku sari na ginani pu ponini gami Goi. Va napo gami Goi koari na Mua lineana guana ovuku.