Pisalem 36:1-8

¹Di huaidu le e mouli i lodo nia manawa o digau huaidu. Digaula gu haga balumee a God ge gu hagalee hagalabagau a Mee.

²Idimaa digaula e hai bolo ginaadou nia mee, e hagabaubau bolo God la hagalee gidee nadau ihala belee hagi aga ginaadou.

³Nadau helekai le e honu i nia huaidu, ge e honu i nia kai tilikai. Digaula gu hagalee hai nia mee ala e humalia ge donu.

⁴Digaula e hai nadau hagataele huaidu i nadau madagoaa ma gaa kii i hongo nadau moenge. Deai nadau mee humalia e hai ai, digaula hagalee kili gi daha di ingoo hua di mee huaidu.

⁵Meenei Dimaadua, do manawa aloho dee modu la guu tugi loo i di langi. Do manawa dahi gu haga honu i lala di langi.

⁶Oo donu la koia e duuduu i nua gadoo be nia gonduu. Dau hagi aga le e llala gadoo be di llala o di moana. Nia daangada mono manu le e madamada humalia iei Goe.

⁷Meenei God, e dahidamee behee go do manawa aloho dee modu! Gimaadou guu gida madau gowaa e duuli ai gimaadou i lala di malu o bakau.

⁸Gimaadou e hai madau hagamiami gi au hagabae meegai ala ne dahi aga, gaa hai gimaadou gi inu mai i nia monowai o do dumaalia.