SALMOS 86:4-16

⁴Toteco, techmaca paquilistli pampa na san ta nimitzhueyichihua.

⁵Toteco, ta nelía ticuali huan timoquetztoc timocualtlalijtoc para titetlapojpolhuis. Tiquinicnelía huan nimantzi tiquintlasojtla nochi catli mitztlajtlaníaj motlapalehuil.

⁶TOTECO, techtlacaquili quema nimotlatlajtía. Quena, techtlacaquili quema nimitztzajtzilía.

⁷Nimitztzajtzilis ipan nopa tonali quema nechajsis tlaohuijcayotl, pampa san ta technanquilía huan techpalehuía.

⁸Ipan nochi sequinoc catli quintocaxtíaj “dioses”, amo onca seyoc quen ta, Toteco. Huan amo aqui hueli quichihua huejhueyi tlamantli quen ta tijchihua.

⁹Elqui ta catli tiquinchijchijqui nochi tlalme ica ininmasehualhua. Yeca hualase huan mitzhueyichihuase, Toteco. Huan mitzhueyitlalise ta catli titlatzejtzeloltic,

¹⁰pampa ta tlahuel tihueyi huan tijchihua huejhueyi tlamantli. ¡San ta nelía tiDios!

¹¹TOTECO, technextili moojhui huan nijtoquilis pampa san ya nopa temachtli. Xijchihua para noyolo ma mitzhueyitlepanita, huan ma quiimacasis mitzixpanos nochi nonemilis.

¹²TOTECO Dios, nimitzpaquilismacas ica nochi noyolo huan nimitzhueyitlalis para nochipa,

¹³pampa tlahuel hueyi motlaicnelilis noca na, huan amo quema tlami. Ta techmanahuijtoc para amo niyas mictla campa tlanahuatía miquilistli.

¹⁴Toteco Dios, miyac masehualme catli mohueyimatij huan catli mosisiníaj motlanantoque para nechhuilanase. Huan miyac tlahuilanca masehualme huan tlaixpanoni quinequij nechmictise, huan amo monejnehuilíaj tlen ta.

¹⁵Pero ta Toteco nelía titetlasojtla huan hueyi moyolo. Amo nimantzi ticualani. San ta titeicnelía huan san ta timelahuac.

¹⁶Techtlachili ica miyac tlaicnelijcayotl huan techmaca chicahualistli na nimotequipanojca. Huan xijmanahui icone mosihua tequipanojca.