A Umana Kakailai 86:4-16

⁴Una vagugu ra bala i kaum tultul, Tago, Luluai, a tulungeagu i nuknuk up u.

⁵Tago u a tena varmari, Luluai, ma u nur vue ra varpiam, Ma i peal kaum varmari tadav diat dia kail u.

⁶Luluai, una valongore kaugu niaring; Ma una torom ta kaugu lavur nilul vovo.

⁷Ta ra bung ba iau ki na malari tana ina kail u, Tago una ga torom tagu.

⁸Luluai, pa ta na mulai ta ra umana god ba amur varogop me; Ma pa ta papalum i da kaum lavur papalum.

⁹Luluai, a umana vuna tarai par u ga vaki diat diat a pot ma diat a lotu ta ra luaina matam; Ma diat a pite pa ra iangim.

¹⁰Tago u ngala kakit, ma u papait ra umana enana magit; U God kakika ma pa ta na mulai.

¹¹Una tovo tar kaum nga tagu, Luluai; ina murmur kaum dovotina. Una vakopono ko ra nuknukigu upi ina ru ra iangim.

¹²Luluai kaugu God, ina pite pa u ma ra nuknukigu par, Ma ina pite pa ra iangim ma pa na mutu.

¹³Tago i ngala kaum varmari tadav iau, Ma u tar valangalanga ra tulungeagu kan ra ruarua na tulungen mara iat.

¹⁴God, diat i kolakolo ra nuknuk i diat dia tar tut ure iau, Ma a loko na tarai na vinarubu dia mainge ba diat a ubu iau, Ma pa dia nuknuk pa u.

¹⁵Ma u, Luluai, u a God na varmari, ma u a tena varmaram, U vavabing ma ra kankan, ma i peal kaum bala na varmari ma kaum dovotina.

¹⁶I boina ba una lingan tadav iau, ma una mari iau, Una tul tar ra dekdekim ta kaum tultul, Ma una valaun natu i kaum tultul, a vavina.