SALMOS 5:3-9

³Sese ijnaloc nelcualca nimitzpohuilía catli nechpano, TOTECO. Mojmostla nimitztlajtlanía catli monequi, huan san nimochiya para technanquilis.

⁴Ta tiToteco Dios catli amo mitzpactía catli amo cuali. Yeca amo tiquincahuilía amo cuajcualme ma itztoca mohuaya.

⁵Catli mohueyimatij amo hueli moquetzase moixpa. Tiquincualancaita nochi catli quichihuaj catli amo cuali.

⁶Tiquintzontlamiltía masehualme catli istlacatij. Quena, TOTECO, amo tijnequi tiquinitas catli tlacajcayahuaj huan temictíaj.

⁷Pero na, pampa hueyi motlaicnelijcayo, huelis nicalaquis mochaj. Quena, huelis nimitzhueyichihuas ipan motlatzejtzeloltijca tiopa, pampa nimitztlepanita huan nimajmahui para nimitzixpanos.

⁸TOTECO, techyacana quen nohuaya timocajtoc tijchihuas, pampa itztoque nocualancaitacahua. Technextili moojhui catli xitlahuac.

⁹Nocualancaitacahua amo quema quiijtohuaj catli melahuac. Amo aqui hueli motemachía ipan inincamanal. Ipan ininyolo san quinequij tetzontlamiltise. Inincamac eltoc fiero quen quema quitlapohuaj se mijca ostotl. Tecamanalhuíaj ica camanali catli yejyectzi san para tlacajcayahuase.