Salmo 5:3-9

³Emun meselem ed-endamen ku is gehinawa ku te kebpengemuyù diyà te kenikew. Ne emun ebpekepasad e en, ne edteǥazan ku is tavak nu te hangyù ku.

⁴Sikew is tutuu he Megbevayà, ne kenè nu igkelipey is mezaat he ulaula; kenè nu edewaten is lalung he menge etew.

⁵Kenà ebpekeuvey kenikew is menge mepelevawen; egkepeukan nu is langun he ebaal te mezaat.

⁶Edezeetan nu is menge teruen ne egkeepesan nu is menge etew he ebpenhimatey te etew wey is menge men-aakal.

⁷Iyan, siak mulà, ebpekeseled a ziyà te valey nu he segradu su ǥeina te utew a kenikew mibmahal. Ne zutun ku sikew ed-ezapa te ked-azap duma te zekelà he kedtahud kenikew.

⁸Nengazen, tenged te mahabet is menge kuntada ku, giyahi-a kenikew sumalà te ketazeng nu. Pekeleduwi nu kediey is utew hustu he paaǥi nu su wey ku iyan mesunud.

⁹Kenà egkeseriǥan is lalag te menge kuntada ku, su iyan dà tuyù dan is kedezaat te zuma he etew. Is menge lalag dan igkepetug-iring te neebriyan he leveng he edsengew is kemahù din. Is menge egkeǥiyen dan ne pudu limbung.