Mbouŋ to Yes Israela 5:3-9

³Yoova, mboŋmaagh to naol ne, yom uloŋlooŋ aliŋag. Ighaze ndugizau, you naghurghur ghasoniiŋ tiou ilat tiom, ve naghur matag payom pa uul ghou.

⁴Maaron, yom lolom pa ŋgar samia maau kat. Ndiran samsamiadi irau tineep toman ghom maau.

⁵Ve ndiran pakuruuŋa irau tiyoon ila matam maau. Pasa, yom ughur koi pa tamtoghon tisob to tighamgham ŋgar samia.

⁶Yes to avodi kaarom, yom ureu di tilaledi. Ve ndiran tombanooŋa ve yes to tirabrab tamtoghon le naghodi siŋ, yom lolom padi rita maau kat.

⁷Eemoghon lolom ineep tuŋia inim tiou ve uluul ghou itaghon saveeŋ mbuaaŋ tiom. Tauto you irau nalooŋ nalat rumai tiom. You naroron payom, ve naput agheg payom ila rumai tiom patabuaŋ.

⁸O Yoova, ŋgar tiom, nene deŋia moghon. Ugham pooz payou, ve upatooŋ ghou pa ataam tiom, leso nataghoni kat. Pasa, koiagŋa tighaze tiwaghamun ghou.

⁹Saveeŋ onoon eta ivot ila avodi maau. Ve lolodi igham pa ŋgar samia moghon tighaze tiwaghamun tamtoghon. Yamadi tortoraaŋ saveeŋ. Avodi inimale naal to avo ikakaak. Tisasavia saveeŋ ŋgoreeŋa naol pa titombaan tamtoghon ve tiwaghamun di.