1Wati yini Tayipirrnga kampangkartu ngarringu wati kutjupaku kurringka. Nyangka wati yini Nayitjintu tjiinya Mama Kuurrku wangka kulira tjakultjunkupayilu pitjangu Tayipirrnga-lu punturnu watjarnu tjiinya wati kutjupaku kurri pampunnyangka. Nyangka palunyalanguru Tayipirrtu turlku ngaanya walkatjunu. Yuwa Mama, ngarlturriwa-tju ngayuku. Tjiinya-rnin mukulyanytjulu miranykanyira kanyilpayi. Yuwa, nyuntulun walkatjunu wantingu palyamunu-rna palyaranyangka. Nyangka-munta-tjun ruwarrpungku wiyalku? Tjiinyamarntun ngarltunytju purlkanya nyinarra.
2Parltjila-rni walykumunula palyamunu-rna palyarnu palunyangka.
3Tjiinya-rna nintilu kulira palyamunu palyantjatjanulu. Palunyalu-rna purtu watarrkurringkula. Tirtu-rna kulira palyamunu palyantjatjanulu.
4Nyuntuku wangka-rna tungun-tunguntu wantingu. Nyuntula mirangka-rna palyamunu palyarnu. Nyangka-rnin tjurrkurltu watjara palyamunu-rna palyannyangka.
5Yuwa, pilyirrngurulpi-rna palyamunu tirtu palyaranytja.
6Yuwa Mama, nyuntulun mukurringkula tjiinya-rna mayuranytjamaalpa tjukarurru nyinarratjaku. Palunyanguru-rni nyuntuku wangka pinangka tjarrpatjurra.
7Parltjila-rni. Nyangka-rna walykumunu nyinama.
8Mama, watjala-rni kalyparringkutjatjanulu. Nyangka-rna pukurlarri nyinama. Nyuntulu-rnin kurltjirr-kurltjirrmanu. Kuwarrinya-rni kurrurnpa pukurlmara kanyinma.
9Tirtu-kurlun kulinma palyamunu-rna palyarnu palunyangka. Wanti. Yuwa Mama, nyuntuku walkangka ngarala. Nyangka-tju ruwarrpuwa wiyala.
10Wiya Mama, kurrurnpa-rni parltjila walykumunula. Palunyalu-rni wuyurrpa tjurrkurlmara kanyinma.
11Wiya Mama, wituntjamaaltu-rni ngamulu kanyinma. Nyuntuku Kuurti Walykumununya katinytjamaaltu wanti. Nyangka-rni ngayula nyinama.
12Pukurlmara-rni kanyinma, nyarra wankarunkulalpi-rnin pukurlpa kanyiranytja, palunyapirinypa. Palunyalu-rni wuyurrmarra nyuntuku wangka wangarnarralu kulira palyaratjaku.
13Nyangka-rnayi nyuntuku wangka nintipungama yarnangu nyarra palyamunu pirningka. Nyangka-yayi pinkurraara marlaku pitja nyuntulakutu.
14Mama, nyuntulu-rnin kutjulu wankarunku. Nyangka-kurlu-rnin ngaparrtjika pungku tjunku tjiinya-rna wati nyarranya pungu tjunkunyangka. Palunyangka-rna mirrarra yinkama nyuntulu-rnin wankarunkunyangka.
15Mama, yirringkala-rni wangkarra-rna nyuntunya marninypungkulatjaku.
16Tjinguru-rnanku mirrka kuka katiku witaralpi nintilku. Wiya, pukurlarrikitjamunu-tjun.
17Tjiinya-rna kurrurnpa tjirturu-tjirturu palyamununguru kurntarringku, palunyangka-tjun pukurlarriku. Palunyalu-rnin wituntjamaaltu ngamuntinku kanyinma.
18Yuwa Mama, walykumunura-tjananya kanyinma yarnangu pirninya nyarra Tjurutjamala nyinarranytjanya. Palunyalu-tjananya yirringkanama. Nyangka-yayi yaarrpa purlkanya yiwarlawana marlakulu parrapalyanma.
19Palunyalu-latju palyamunu palyaralpi kurntarringkula nyinanytjatjanulu puluka pungku witalku nyuntuku nintilku. Nyangkan pukurlarriku.
