1O Maaron, yom lolom ineep tuŋia ila to tamtoghon tiom ve uluul di. Tovenen lolom isamin ghou, ve upul sosor tiou. You nazoor aliŋam. Eemoghon poia tiom, nene tiina, ve lolom isamin tamtoghon tiom kat. Tovenen ureu sosor tiou isob ilale.
2You nayel pa ataam tiom, ve nagham ŋgar samia ila matam. Urughuuz ghou, ve ugham ghou naŋgalaaŋ ila matam muul. Ureu sosor tiou isob ilale.
3Pasa, you naghilaal sosor tiou wa. You nazoor aliŋam, ve nayel pa ataam tiom. Moghon moghon, sosor tiou inepneep toman ghou, ve matag iŋgalŋgali.
4Sosor to naghami, nene iŋarua ghom moghon. You nagham ŋgar samia ila matam. Tovenen ighaze uvotia sosor tiou ivot ighazooŋ, nene deŋia. Onoon kat, ighaze uŋgabiiz ghou ve ughur atia payou, nene sosor maau.
5Sawa to tinaŋ ipoop ghou ve inim, you nayel pa ataam tiom. Sawa to tinaŋ inaama payou, samia ikis ghou pataghaaŋ wa.
6Maaron, yom ughaze you nataghon saveeŋ onoon toman lolog. Tovenen taum upatooŋ ghou pa ŋgar popoia. Leso nakisi tuŋia ila lolog.
7Ureu sosor tiou isob ilale. Leso naŋgalaaŋ ila matam. Urughuuz ghou le naŋgalaaŋ kat nanimale yaghur tae pisosooŋa.
8You naghaze nalooŋ ghom usaav ughaze yom ureu sosor tiou wa. Leso tinig iza, ve lolog poia muul. Yom ughur pataŋani tiina kat iŋarua ghou pa sosor tiou. Uul ghou, leso tinig iza muul.
9Ŋgar tiou naol to tiyel pa ataam tiom, matam ila padi muul malep. Ureu sosor tiou isob ilale.
10Maaron, ugham ŋgar ŋgalaaŋa ivot ila lolog, ve upalot ghou. Leso nayoon tuŋia muul, ve nataghon katin ŋgar tiom.
11Undiir ghou pa naghom malep. Ve uŋgwaaz Avuvum Patabuaŋ ighau payou malep.
12Muuŋ, yom ugham mulin ghou le lolog poia kat. Aazne, naghaze ugham tovene payou muul. Upamundigin ghou, leso matag loŋloŋaiŋa payom irau sawa isob.
13Ighaze ugham tovene, you pale napatoot yes to tizorzoor aliŋam, ve yes to tighamgham sosor pale titoor ŋgar todi imuul ilat payom.
14Maaron, sosor tiou to narab tamtoghon imaat, nene tiina kat. Irau namaat pani. Eemoghon yom Maaron tiou ve Volaaŋa tiou. Tovenen ugham mulin ghou, ve ureu sosor tiou ilale. Leso lolog poia kat, ve nambou tapirig, ve napait izam pa ŋgar tiom deŋia.
15You mayag pa sosor tiou, ve neneeŋag. Tovenen ureu sosor tiou ilale. Leso avog pakia, ve napait izam.
16Maaron, yom lolom pa nagham ŋgai inim watooŋrau payom malep. Watooŋrau to yab ighan suvuni ne paam. Inimale igham ghom lolom poia, tone naghami. Eemoghon yom lolom pa ŋgar tovene maau.
17Watooŋrau to yom lolom pani, nene vene: You irau natatan taug, ve lolog ipataŋan pa sosor tiou. Nene watooŋrau kat. Tamtoghon to ighaze itatan tau, ve lolo ipataŋan pa sosor toni, nene yom irau upul murim pani maau.
18Maaron, ugham poian ndug Zion itaghon taum lolom. Ugharaat mulin didiiŋ ariaŋa to iluvut Yerusalem, le izala iyoon muul.
19Leso nigham watooŋrau to deŋia ila matam. Pale niyou makau tinim, ve nighur di tizala artaal tiom, ve yab ighan suvun di. Leso ughita ve lolom poia kat.
