SALMOS 50:8-23

⁸Amo nimechajhuas pampa amo antechmacaj tlacajcahualistli, niyon pampa amo anquinmictíaj tlapiyalme huan anquintlatíaj noixpa, pampa quena, ya nopa anquichihuaj.

⁹Pero amo ya nopa catli nijnequi. Para na amo monequi techmacaca tlacajcahualistli, quen becerros huan oquich chivojme catli hualahuij amopotrero.

¹⁰Pampa na noaxcahua nochi tlapiyalme ipan cuatitlamitl huan nochi huacaxme catli campa hueli tlacuajtinemij ipan senquistoc nochi tlachiquilme.

¹¹Niquiniximati nochi totome campa hueli huan nochi tlapiyalme catli nemij cuatitla, pampa noaxcahua.

¹²Sintla nimayanasquía, amo nimechtlajtlanisquía techtlamacaca, pampa ni tlaltipactli huan nochi catli eltoc ipani noaxca.

¹³¿Anmoilhuíaj nimotlamaca ica torojme ininnacayo, huan niquiji inieso oquich chivojme? ¡Amo!

¹⁴Nijnequi techtlascamatilica ica nochi catli nimechchihuilía huan ya nopa niquitas quen se tlacajcahualistli. Xijtlamichihuaca nochi catli anquiijtojtoque para anquichihuase.

¹⁵Huan technojnotzaca quema anmotequipachohuaj, huan na nimechmanahuis huan amojuanti antechnextilise miyac tlatlepanitacayotl.”

¹⁶Pero Toteco quinilhuía masehualme catli amo cuajcualme: “Amo anquipiyaj tequiticayotl para ancamanaltise tlen nopa camanal sencahuali, catli quiijtohua catli nimechmacas, niyon amo hueli antepohuilise notlanahuatilhua.

¹⁷Pampa amo anquicaquij quema nimechtlacahualtía, niyon amo anquichihuilíaj cuenta nocamanal.

¹⁸Quema anquiitaj se tlachtejquetl, anmohuampoxchihuaj ihuaya, huan nojquiya anmohuicaj ininhuaya catli quichijtinemij tlen hueli ica catli amo ininnamic.

¹⁹San campa hueli anquicalaquijtinemij amonenepil para anquiijtose catli fiero. Nimantzi anistlacatij.

²⁰Anmosehuíaj huan anquitelhuíaj se catli amonelicni. Quena, yaya catli nojquiya icone amonana huan san sejco anmoscaltijque, anquitlaijilhuíaj.

²¹Nochi ya ni anquichijtoque, huan na amo tleno niquijtojtoc. Huajca anmoilhuijtoque para na nieli san se quen amojuanti. Pero ama nimechixcoilhuis nochi catli anquichijtoque, huan nimechpannextilis nochi.

²²Xijtlacaquilica ya ni, amojuanti catli antechelcahuaj na, niamoTeco Dios. Sintla amo antechelnamiquij, nimechhuejhuelos huan amo aqui itztos catli huelis anmechmanahuis nomaco.

²³Pero quema antechtlascamatij ica nochi catli nimechchihuilía, eltoc quen se tlacajcahualistli catli nechnextilía antechtlepanitaj. Huan nopa masehuali catli monejnehuilía campa mocuapolojtoc, huan mocuepa ipan noojhui catli xitlahuac, na nijmaquixtis.”