Yaburina 50:8-23

⁸N mi ɛ maxadima ɛ saraxane xan ma fe ra. Ɛ saraxa gan daxine bama n xa waxatin birin.

⁹Koni, n mi turaan xa tongoma ɛ sansanne yi xanamu kɔtɔn naxan ɛ kulane yi.

¹⁰Amasɔtɔ n gbeen nan burunna subene birin na. N gbeen nan ɲingene ra naxanye geya wuli wuyaxine ma.

¹¹N tan nan xɔline ngaan kanna ra naxanye geyane ma e nun niimaseen naxanye birin fixɛne ma.

¹²Xa kamɛn yi n suxun nɛn nun, n mi na falɛ i xa, amasɔtɔ n tan nan gbee dunuɲa nun ayi seene birin na.

¹³N ɲinge suben donɲɛ ba? Ɛn-ɛn de! Xanamu n siin wunla min? Ɛn-ɛn de!

¹⁴Nanara, barika biran xa findi ɛ saraxan na Ala xa. Ɛ ɛ dɛ ti xuine rakamali Kore Xɔnna Ala xa.

¹⁵N xili tɔrɔ waxatini. N ni i kantanma nɛn, i yi n binya.”

¹⁶Koni Ala a falama muxu ɲaxine xa nɛn, a naxa, “Nanfera ɛ xɛtɛma n ma tɔnne falan ma, ɛ yi n ma layirina fe fala,

¹⁷koni n ma xaranna mi rafan ɛ ma? Ɛ mɛxi n ma falane ra!

¹⁸Ɛ nun muɲadene na a ra. Ɛ nun yalundene na a ra.

¹⁹Ɛ fala ɲaxin nan tun tima. Ɛ wulen nan tun falama.

²⁰Ɛ ngaxakedenne kansunma waxatin birin yi. Ɛ katama e tɔɲɛgɛdeni.

²¹Ɛ bata ito birin liga n mi fala ti. Nanara, ɛ mirixi a n fan ligaxi alo ɛ tan. Koni iki, n na ɛ maxadima, n yi a yɛba ɛ xa.”

²²“Iki, ɛ ito famu, ɛ tan naxanye Ala bɔtɛ rabaxi. Xa na mi a ra, n na ɛ raxɔrima nɛn. Muxu yo mi ɛ xunbɛ.

²³Naxan na saraxa baan findi barika biran na, na nan n binyaxi. Naxan na siga kira faɲin xɔn, n na Ala kisin yitama nɛn na ra.”