Pisalem 50:8-23

⁸Au hagalee gabunga goe i au tigidaumaha mo nia tigidaumaha dudu ala e haihai kooe mai gi di Au i nia madagoaa huogodoo.

⁹Au hagalee hiihai e kae agu kau daane mai i dau abaaba, be nia kuudi mai i lodo dau hagabuulinga kuudi.

¹⁰Nia manu huogodoo ala i lodo henua mono kau ala i tomo nia gonduu e mana la nia mee ni aagu.

¹¹Nia manu mamaangi huogodoo mono mee huogodoo ala e mouli i lodo henua la nia mee ni aagu.

¹²“Maa nei bolo Au ma ga hiigai, Au hagalee madau agu meegai adu gi di goe, idimaa, henuailala mono mee huogodoo ala i no lodo la nia mee ni aagu.

¹³E hai behee? Au e gai nia goneiga kau daane, be e inu nia dodo kuudi?

¹⁴Heia dau tigidaumaha danggee ang gi God, mo di wanga gi di Gowaa Aamua au mee huogodoo ala ne hagababa ang gi Mee.

¹⁵Gahigahi ina Au i do madagoaa haingadaa, gei Au ga haga dagaloaha goe, gei goe ga hagaamu Au.”

¹⁶Gei God ga helekai gi digau huaidu, “Goodou e aha ala e agoago agu haganoho? Goodou e aha ala e leelee i agu hagababa?

¹⁷Goe e de hiihai gi di Au dela e aago goe, goe guu kili gi daha agu haganoho.

¹⁸Goe e hagadau ihoo gi digau gaiaadanga huogodoo ala ma ga gidee goe, gei goe e hagadaubuni ang gi nia daane mono ahina mouli be nia manu.

¹⁹“Nia madagoaa huogodoo gei goe e helehelekai huaidu, gei goe hagalee madugidugia di helekai tilikai.

²⁰Goe e hai baahi gi oo gau donu, ge e halahala au huaidu gi digaula.

²¹Goe guu hai nia mee huogodoo aanei, gei Au nogo noho hua deemuu, malaa, goe e hai bolo Au e hai gadoo be goe. Gei dolomeenei, gei Au ga haga donu adu gi di goe, ga hagamodongoohia haga mmaa adu gi di goe.

²²“Goodou ala e haga balumee au, hagalongo mai. Maa goodou hagalee hagalongo, gei Au ga daaligi goodou gi daha, deai tangada e mee di haga dagaloaha goodou ai.

²³Di danggee la tigidaumaha dela e hagalaamua Au, gei Au ga haga dagaloaha digau huogodoo ala e hagalongo mai gi di Au.”