SALMOS 34:4-20

⁴Nijtzajtzili TOTECO ma nechpalehuiqui, huan yaya nechtlacaquili huan nechmanahui tlen nochi catli nechmajmatiyaya.

⁵Sequinoc catli motemachíaj ipan Toteco ixcahuanij ica paquilistli nojquiya, por catli yaya quinchihuilijtoc. Amo quema pinahuase.

⁶Masque nipilteicneltzi, nijtzajtzili TOTECO, huan yaya nechmaquixti ica nochi tlamantli catli nechtequipachohuayaya.

⁷Itequihua TOTECO quinmocuitlahuía nochi catli quiimacasij TOTECO, huan yaya quinmanahuía.

⁸Xijyejyecoca TOTECO huan anquiitase para melahuac cuali iyolo tohuaya. Hueyi paquilistli quipiyaj nochi masehualme catli ipan ya motemachíaj.

⁹Nochi amojuanti catli aniaxcahua TOTECO, xiquimacasica, pampa nochi catli quitlepanitaj amo tleno quinpolohua.

¹⁰Nopa tecuanime catli más quipiyaj chicahualistli quemantic mayantinemij huan amo quipantíaj catli quicuase, pero masehualme catli quitemohuaj TOTECO quipiyase nochi catli cuali.

¹¹Xihualaca noconehua, huan techtlacaquilica, huan nimechmachtis quenicatza monequi anquitlepanitase TOTECO, huan anquiimacasise anquiixpanose.

¹²¿Tijnequi tiitztos ica yejyectzi? ¿Tijnequi tihuejcahuas ipan ni tlaltipactli, huan tiquitas catli cuali?

¹³Monequi xijmocuitlahuis monenepil para amo tiquinmahuispolos sequinoc ica istlacatili.

¹⁴Ximoiyocatlali ica catli amo cuali, huan xijchihua san catli xitlahuac. Xijchihuaca catli anhuelij para ma oncas tlasejseltili ininhuaya nochi masehualme. Quena, ya nopa xijtemoca ica nochi amoyolo.

¹⁵TOTECO quintlachilía catli nemij xitlahuac iixpa, huan san quichiya para quinmacas catli quitlajtlanise.

¹⁶Pero TOTECO sencualantoc ica inijuanti catli quichihuaj catli fiero. Quintzontlamiltis para ma ayacmo aqui quinelnamiquis ipan ni tlaltipactli.

¹⁷Quema masehualme catli itztoque xitlahuaque iixpa TOTECO quitzajtzilíaj, yaya quintlacaquilía. Huan quinmanahuía tlen nochi inincuesolhua.

¹⁸TOTECO itztoc ininnechca masehualme catli motequipachohuaj. Huan quinmaquixtía catli motequipachohuaj ica inintlajtlacolhua.

¹⁹Se masehuali catli itztoc xitlahuac iixpa TOTECO quipiya miyac tequipacholi, pero TOTECO quimanahuía ica nochi catli ipanti.

²⁰Pampa TOTECO quimocuitlahuía para amo postequis niyon se iomiyo.