Sabóor 80:1-17

¹Mu jëm ci njiital jàngkat yi, dëppook galan bu ñuy wax Tóor-tóor yi, di seedeb Sabóor, giiroo ci Asaf.

²Éy yaw, Sàmmu Israyil, teewlu nu; yaw mi jiite Yuusufa ni ag jur, yaw mi toogandook malaakay serub yi, feqal sag leer.

³Dawalal sa njàmbaar, ñeel Efrayim ak Beñamin ak Manase, te wallusi nu.

⁴Éy Yàlla, suqli nu; geesoo nu sa leeru kanam, nu raw.

⁵Éy Aji Sax ji, Yàlla Boroom gàngoor yi, foo àppal sa mer, mi ngay wuyoo sa ñaanu mbooloo mi?

⁶Leel nga nuw naqar, nàndal nu mbàndum rongooñ,

⁷def nga dëkkandoo di nu xëccoo, noon di nu ree.

⁸Éy Yàlla Boroom gàngoor yi, suqli nu; geesoo nu sa leeru kanam, nu raw.

⁹Yaa déjjatee reseñ Misra, dàq yéefar yi, indi, jëmbataat.

¹⁰Nga wéex ko, mu sampu, law, dajal réew mi;

¹¹keppaaram muur tund yi, ay caram sàng garabi seedar yu mag yi.

¹²Mu tàllal ay bànqaasam ba géej, lawal njebbit la ba dex ga.

¹³Lu tax nga bëtt ay miiram, ba ku fa jaare witt ca,

¹⁴mbaam àll di ko ruur, ndundati àll di ca for?

¹⁵Éy Yàlla Boroom gàngoor yi, geesul; séentool asamaan, ba gis te taxawusi reseñ jii.

¹⁶Taxawusil njëmbat lii nga jëmbate sa ndijoor, ngarab sii nga dooleelal sa bopp.

¹⁷Dees koo gor, taal; yal na ñii sànkoo sa mbugal.