Sabóor 69:5-24

⁵Sama kawari bopp sax, ñi ma bañ ci daraa ko ëpp. Ñu bare doole, bëgg maa sànk, noonoo ma ci dara. Sàccuma, nara fey!

⁶Yaw Yàlla, xam nga sama jëfi dof, te samay tooñ umpu la.

⁷Yàlla buma rusloo ñi la yaakaar, yaw Boroom bi, Aji Sax ji Boroom gàngoor yi, yàlla buma gàcceel ñi la topp, yaw Yàllay Israyil.

⁸Yaa tax ma dékku, ñu di ma sewal, ma rus ba sëlmoo gàcce.

⁹Jaambur laa léegi ci saay bokk, mel ni doxandéem sama biir doomi ndey.

¹⁰Damaa xér ci sa kër gi, ba jeex tàkk, te jëf ji ñu la sewale man la dal.

¹¹May jooy, di woor, ñu di ma sewal.

¹²Ma sol ay saaku, di ko ñaawloo, ñu di ma léebu.

¹³Waa pénc ma di ma tooge, màndikat yi di ma woyal.

¹⁴Waaye man, Aji Sax ji, yaw laay dagaan. Éy Yàlla, na tey di bésub yiw. Ngalla nangul ma ci sa ngor lu yaa ak sa wall gu wóor.

¹⁵Xettli ma ci ban bi, ma baña suux, xettliku ci samay noon. Rikk génne ma yii xóotey ndox,

¹⁶ba gannax du ma mëdd, xóotey géej du ma warax, pax du ma kepp.

¹⁷Éy Aji Sax ji, yaa rafet ngor, nangul ma! Geesoo ma sa yërmande ju yaa!

¹⁸Bu ma làqu, Sang bi. Jàq naa, gaawe ma.

¹⁹Jege ma, jot ma, musal ma ci noon yi!

²⁰Yaa gis ñu di ma sewal, di ma ruslook a torxal, yaa ngi ne jàkk ci noonoo noon.

²¹Dees maa sewal, sama xol jeex, ma wopp; may sàkku yërmande, awma ko; ku ma dëfal it, gisuma ko.

²²Tooke lañu ma leel, ma mar, ñu nàndal ma lu forox.

²³Yal na seen ndab di seenum yeer, seeni am-di-jàmm di seenug fiir.

²⁴Yal na seeni gët giim, ba dootu gis; yal na seen ndigg rëcc fàww.