Sabóor 68:14-34

¹⁴Yeen ñiy waaf ci gétt gi, bésub xare, gànjar a ngi, di laafi pitax yu ñu xoob xaalis, dunq ya teg wurus wuy ray-rayi.»

¹⁵Ba fa Aji Man ji tasaaree buur ya, tawub yuur a ngay sóobe tundu Calmon.

¹⁶Yaw tundu yàlla yi, yaw tundu Basan, tundu Basan, tund wi ci coll yi,

¹⁷looy xeelook say coll, di fiire tund wi Yàlla namma dëkke? Aji Sax ji kat, fa lay dëkk ba fàww!

¹⁸Watiiri xarey Yàlla di ñaar fukki junni (20 000), ba ci junniy junni. Boroom bi ne ca seen biir, di boroom tundu Sinayi fa biir sellngaam.

¹⁹Yaa yéeg fa kawa kaw, jàpp ay jaam, yóbbaale. Yaa nangooy galag ci nit ñi, ba ci ñiy fippu ndax li Yàlla Ki Sax dëkke Siyoŋ.

²⁰Cant ñeel na Yàlla bésoo bés. Moo nuy jaboote. Yàllaa nuy musal. Selaw.

²¹Sunu Yàllaa di Yàlla jiy walloo, Aji Sax ji Boroom beey musal bakkan.

²²Yàlla daal ay rajaxe boppi noonam ak kaaŋ mu sëq mu boroom wéye tooñ.

²³Boroom bi nee: «Basan laay waññee noon yi, waññee leen xóotey géej,

²⁴ngeen mana xuus ci seen deret, seeni xaj séddu ci seeni néew.»

²⁵Céy Yàlla, gis nañu sa gàngoor di daagu, sama Yàlla, sama buur, sa gàngoor ba ca biir kër gu sell ga.

²⁶Woykat ya jiitu, xalamkat ya mujje, janq ji yéewe leen tëgg um njiin.

²⁷Dajeleen, di sant Yàlla, yeen askanu Israyil, santleen Aji Sax ji.

²⁸Giirug Beñamin a ngi jiitu, gën cee néew, njiiti Yuda topp caak seeni kurél, njiiti Sabulon topp caak njiiti Neftali.

²⁹Yeen, seen Yàlla dogalal na leen kàttan; éy Yàlla, jëfeel doole ja nga nu jëfeeloon.

³⁰Sa kër gi tiim Yerusalem, fa la la buur yiy indiley galag.

³¹Nanga fa gëdde rabu àll wi ci barax yi, ñooy gétti yëkk yi, xeet yi ci des diy sëllu. Gëdd leen, ba ñu sujjóotalsi laak dogi xaalis. Tasaareel xeet yooyu sopp xare,

³²ay kàngam bàyyikoo Misra aki galag, réewum Kuus baral loxoom, indil Yàlla.

³³Yeen waa réewi àddina, woyleen Yàlla, teral-leen Boroom bi, Selaw

³⁴gawar bi ci asamaan, asamaani démb. Ma ngooguy àddu kàddug doole.