Sabóor 35:1-23

¹Ñeel Daawuda. Éy Aji Sax ji, digaaleel ak samay digaale, xeexal maak ñi may xeex.

²Fëkkal sa pakk ak sa kiiraay, taxawusi ma,

³xàcci sa xeej ak sa sémmiñ, dajeek ñi may dàq. Déey ma, ne ma: «Sag mucc, man a.»

⁴Ñiy wut sama bakkan, yal nañu rus ba torox; ñi may fexee lor, yal nañu leen waññi, sewal leen.

⁵Yal na leen malaakam Aji Sax ji bëmëx, nim ñax mu ngelaw wal.

⁶Yal na leen malaakam Aji Sax ji dàq, ñuy lëndëmtuy tarxiis.

⁷Defuma dara, ñu di ma fiir, defuma dara, ñu gas um yeer, di ma tëru.

⁸Yal nañu sànkoo mbetteel, keppoo seen fiir, sànkoo seenum yeer.

⁹Su boobaa ma bége Aji Sax ji, bànneexoo wallam,

¹⁰di ko sante sama jëmm jépp, naan: «Éy Aji Sax ji, ana ku mel ni yaw, di xettli néew-ji-doole ci boroom doole, ak ku néewleek ku ñàkk ca ka leen di lekk?»

¹¹Nit ku bon a ngi may duural, di ma jiiñ lu ma yégul.

¹²Ma ji leen njekk, ñu fey ma njekkar, ndaw tiisu xol!

¹³Man de ba ñu woppee, maa ngi ñaawlu, di woor, toroxloo, sukk, ñaanal leen,

¹⁴tiisoo leen ni saab xarit mbaa doomu ndey, di ñaawlook a yoggoorlu ni ku ñàkk yaay.

¹⁵Ma daanu tey, ñu daje di ko bége, dajaloo fi sama kaw, di ma fexeel te yéguma, di ma yàpp, tëë ba.

¹⁶Tekkiwuñu dara, di ma ñaawal rekk te di ma màttu.

¹⁷Éy Aji Sax ji, loo deeti seetaan? Musal ma ci seenum pàdd, wallu ma ci yii gaynde, sàmmal ma sama benn bakkan bii!

¹⁸Maa lay sante fa ndaje yaatoo, màggal la digg mbooloo mu yaa.

¹⁹Noon bu ma deful dara, yàlla bumu gis lu mu ma damoo. Ku ma bañ ci dara, yàlla bumu ma ree.

²⁰Waxuñu jàmm, xanaa di ràbbal niti jàmm ci réew mi ay kàdduy tuuma.

²¹Ñu ngi ma ŋa ŋàpp, di ma tuumaal, naan: «Yaw a, yaw a, noo la gis!»

²²Éy Aji Sax ji, yaa ci gis, bul selaŋlu, éy Boroom bi, bul ma sore.

²³Jógal, sàmmal ma sama àq. Sama Yàlla, Boroom bi, àtte ma yoon.