Süleymanin Məsəlləri 30:2-13

²Həqiqətən, mən hamıdan ağılsızam, İnsan idrakına malik deyiləm.

³Nə hikmət öyrənmişəm, Nə də Müqəddəsin biliyindən xəbərim var.

⁴Kim göylərə qalxıb endi? Kim yeli ovcunda topladı? Kim suları paltarına sarıdı? Yer üzünün qurtaracağınadək hər yeri kim yaratdı? Adı nədir? Oğlunun adı nədir? Bilirsənmi?

⁵Allahın hər bir kəlamı safdır, Ona pənah gətirənlərin sipəri Odur.

⁶Onun sözünə heç nəyi əlavə etmə, Yoxsa səni tənbeh edər, yalanını çıxarar.

⁷Ey Allah, Səndən iki şey istəyirəm, Nə qədər ömrüm var, məndən onları əsirgəmə:

⁸Saxta, yalan sözlər qoy məndən uzaq olsun; Məni nə yoxsul, nə də zəngin et, Ancaq mənə gündəlik çörəyimi ver.

⁹Varlansam, «Rəbb kimdir?» deyə Sənə küfr edərəm, Yoxsul olsam, oğurlaram və Allahımın adını ləkələrəm.

¹⁰Qul barədə ağasına pis sözlər demə, Yoxsa sənə qarğış edər, bu təqsirlə yüklənərsən.

¹¹Adam var ki, atasına qarğış edir, Anasına alqış etmir.

¹²Adam var ki, özünü təmiz sanır, Amma murdarlıqdan təmizlənməyib.

¹³Adam var ki, yuxarıdan aşağı baxar, Təkəbbürlə baxmaq üçün gözlərini qaldırar.