14Satan oh Jisas ohnong mandam saporhan gahan Got orhe Yahsup oh Jisas ohe mutuhnong ruumsan mar teip matporhan ama ohe kasip ohsi it Gariri mongnong ama pip oh. Sus patin orhe ma ihat pat ohe meng oh kuuhan ihir rit saperhan aptei aptei ihir gon ama amratpa oh.
15Amratperhan gahan Jisas oh iraire rotu ap ap oh ros meng ama am deisuh oh. Am deipatin ihir amrama gonsi ihir orhe winnong adaptuhur ama amam deishe oh.
16Jisas oh rotu ap ap oh ros meng am deipatdapat gahan orhe hanip yah hatip aptei Nasaret apteinong apingopri. Aprisa gahan Juda iraire tuperipti dik sabat oh hatporhan Jisas oh orhe tuperipti dik rotu ap rosa meng am deipatru mat meng am matporo rim rotu ap rongopri. Rosa Got ohe ritporhan ma brak matpa meng oh satporim tandeingopri.
17Tandeitporhan ihir Got ohe meng ritporhan Aisaia ohe brak matip bok oh dat apingopari. Apriperhan oh dapema wandeipat mama brak matip meng moh satpora rim sangopri.
18Ma sa oh Kakhan ihirnong wer kak tei amor ma kis deiptiru mat orhor nohnong Got oh orhe Yahsup ohsi Go gin mama Yahsup mohe kasip ohsi susa borop hat pati han bap ihirnong norhe yah meng moh pot pisashenmur. Pot ma pisasipra oh nang tatpat pati han ihirnong Gin gure nang tatpat ma pati oh Got oh gin arpit namdamur poro Gin gure kin kwi hat ma pati oh Got oh gin kin nadipekamur poro gipot pisashenmur. Gipot pisusa kat han ire hrepnong mar er mat papti bap ihirnonghe ambura iraire yah hat sashen ohe teinong mat pisashenmur.
19Imat pisusa Gin Hanipyah orhe napanggeim yah nahatin dik oh gin hahmuro pot pisashenmur napor nohnong kis naham nadarhetirmur.
20potporhan Aisaia ohe brak matip meng oh Jisas oh sapat it tein mara rotu ap ma tamreipat han ohnong it aprisa ihirnong meng potinmat tongnongopri. Tongnotporhan kuuhan gonsi ihir Kian meng napotiproho daham kin oh ohnongwi wamat inpari.
21Wamat patin Jisas oh Gin Noh Aisaia ohe ma brak matip meng moh satporhan gur amram wanahat patin orhor dam tarpamur pora imat meng por am deingopri.
Ruk 4
Ruk 4:14-21