Lucas 4:14-21

¹⁴Ontò egbeyà-beyaan te Espiritu Santo si Jesus. Dimoton sikandin te probinsya te Galiliya, aw dimineg se kedita te otaw kidoen te dengeg din.

¹⁵Timeped sikandin te menge simbahan te Judiyo amon megtoladà, aw induyun sikandin te kedita te otaw.

¹⁶Penga niyan, minolì si Jesus doton te Nasarit. Yan se lonsod tinillesan din. Pegkesebado, dimoton sikandin te simbahan te Judiyo, so yan se ketanem din. Timindeg sikandin amon megbasa te kagi te Timanem.

¹⁷Imbegay dan diyà kandin se libro insolat te telekeliwat te kagi te Timanem gebii si Isaias. Migbeka sikandin kenyan aw migbasa te kagi seini,

¹⁸“Dini kanak se Espiritu Santo, so pinemallì a din amon megtoladà a te Mèpiya Indan diyà te menge otaw sagkep. Insogò a din amon mikagi a diyà te menge otaw kineleboso te ipelowà den dan te Timanem. Insogò a heman amon mikagi a diyà te menge otaw bota te komità den dan. Insogò a din amon megpelowà a te kedita te otaw nelimahan,

¹⁹aw amon megpetaga-taga a te dimateng den se aldaw te ipekità te Pengolo se keido din.”

²⁰Penga te pegbasa din kenyan, linolon din se libro aw in-olì din diyà te egpengibing te simbahan. Penga niyan, nenenoo si Jesus amon megtoladà. Penga niyan, netingen se kedita te otaw aw timengteng dan diyà kandin.

²¹Nayan, migtebò si Jesus migtoladà, kagi din, “Seini aldaw, netoman den se kagi te Timanem dinineg niyo.”