14जमाहेन्से परमेश्वरला आत्माला शक्तिरी येशू गालील अञ्चलरी दोःसी फेप्खजी। ओच्छे थेला बारेरी क्यारमारला जम्मान ग्लारी थेःजी।
15येशू यहूदीगदे ह्रुप तबा दिम दिमरी फेप्सी म्हिगदेदा लोप्बारी छ्याइजी। जमाहेन्से जम्मान म्हिगदेसे थेला जयजयकार लजी।
16जमाहेन्से येशू ह्राङ छर्बा नासरत नाम्सारी फेप्खजी। ओच्छे थे सदन ह्रङ् लसी ब्लप्बा न्हबा धिनकुनु यहूदीगदे ह्रुप तबा दिमरी फेप्सी परमेश्वरला बचनग्याम पढब लबारी छ्याइजी।
17ओच्छे थेदा यशैया अगमवक्तासे भ्रिबा किताब पढब लबाला लागिरी पिन्जी। जमाहेन्से थे ठोङ्सी चुह्रङ् भिसी भ्रिबा ग्ला तेःसी पढब लजी।
18“परमप्रभु परमेश्वरला आत्मा ङादेन छ्याम मुला। तिग्दा भिसम प्राङबोगदेदा परमेश्वरला य्हुल्साला समाचार थेःना लबारी ओच्छे झ्याल्खानरी मुबागदेदा परमेश्वरला य्हुल्साला समाचार थेःना लसी झ्याल्खानग्याम तेःबारी, मी आम्राङ्बागदेदा मी म्राङ्ना लबारी ओच्छे दुखरी मुबागदेदा दुखग्याम फेबारी,
19थेह्रङ् लसीन ह्राङला म्हिगदेदा परमेश्वरसे थार्बा पिन्बा धुइ खसी जिन्बा मुला भिसी थेःना लबारी परमेश्वरसे ङादा धम्सी पुइखबा हिन्ना।”
20जमाहेन्से येशूसे किताब बन्द लसी थेरी मुबा म्हिदा पिन्सी धन्छ्याजी। यहूदीगदे ह्रुप तबा दिमरी मुबा जम्मान म्हिगदेसे येशूदा च्यासी चिबा मुबा।
21ओच्छे येशूसे थेनीगदेदा “परमेश्वरला बचनरी भ्रिबा चु ताम तिनी एनीगदेसे ङ्यान्ना ङ्यान्नान पूरा तबा मुला” भिसी सुङ्जी।