Luka 4:14-21

¹⁴Iliꞌi no anu tovotovo, la xaviinu Uleenu Tavuna muꞌanaꞌana noxou Iesu sou mulivu no xalee lia tila ne Xalilaia. Anu mulivu, la ta mitema no xalee lia mukalusi ne minoꞌu aꞌalosou la, milavusou lexe Iesu Anu a mulivu muneꞌe ne Xalilaia.

¹⁵Xe Anu mulosiꞌa ta mitema lavulavu no taasou la lotu noxiꞌa ta Iutaia, la ta mitema mukalusi miꞌitinu ualasou.

¹⁶Xe iliꞌi, la Iesu mulai ne Nasaleti. No mine anu kituꞌaxu sio, la muxolu no tuala ane ne mo muxali tila no anu. No voxo Tavuna vile, la Anu muꞌunalai no taasou lalotu noxiꞌa ta Iutaia loxo Anu ulavusou uꞌunalai no anu. Xe Anu muꞌunalai mukalu, la mutulu sou lexe uitisou vaikala noxou Lataua.

¹⁷La aneꞌi milosou lavuku e Aisaia anu itema sou palomatana mukaukavunu mipipinu muai. Anu munoꞌu ka muxavulalanu sou mukamuli vaikala vile muvikala aloxo ꞌo,

¹⁸“Uleenu Tavuna noxou IAUE, anu a uxolu noxilo ꞌo. Xo anu IAUE musosovosilo sou lexe eni aaꞌaloxu aꞌalo laixe noxou Lataua noxiꞌa ta mitema e iꞌa lavuluti uasi. Anu mupalusilo sou lexe eni alulusiꞌa ta mitema ane mixolu no anu taasou navunavu, mo avikalaneꞌi aneꞌi e ieꞌi seleselevenu lexe ieꞌi ukaa la. Mo Anu mupalusilo kalumo sou lexe eni akalusou tuꞌutuꞌumaxu noxiꞌa ta mitema aneꞌi ane ta tatilasiꞌa miꞌoxo masuaneꞌi,

¹⁹mo avikalaneꞌi no anu voxo sou IAUE ualaunasiꞌa ta mitema.”

²⁰Iesu muitisou aloxo ne mukalu, la mupipinu mukalu la mulosou itema sou usaxilaꞌu kaukavu ne. Io, Anu muxolu no lia, la ta mitema mukalusi mixolu no nano ne, mimatakisou.

²¹Ia Anu muavuti la muvikalaneꞌi aloxo ꞌo, “Kaukavu ane eni eitisou ꞌo, anu a muxali manina vaimomo ꞌo loxo ngingi ngelomusou ne.”