Luke 4:14-21

¹⁴Jesuanha Galilee-urnantama alpuka. Enka Alkngaltara era ekuralela naka, erinha ekarltilaka turta. Yia ekuriperrantama parrpa ntakerraka relha ntjarrurna.

¹⁵Erantama relha ntjarranha synagogue-ala kaltjinthitjata. Etna turta erinha kngarra tnantjitjata.

¹⁶Kurunga Jesuanha Nazareth-urna alpuka, town nhanga erala mangkakala ekururna. Era kutatha Sabbath arltala synagogue-urna lhitjata. Lakinhanga era Nazareth-ala Sabbath arltala namanga, era kala synagogue-urna lhakantema. Erantama kamerramala read-erritjika itnaka.

¹⁷Artwa nyintalantama erinha pepa nthaka Altjirraka urrpia Isaiah-aka angkatjakarta. Pepa erinha altjurilamala, era angkatja nhanhaka read-erraka,

¹⁸“Ingkartala Enka ekuranha nukurna yairnaka. Era yinganha urraraka Yia Marra erinha relha kornarintja ntjarranha ilitjika. Era yinganha urrpia yairnaka, relha errintjala errkukala ntjarranha ilitjika, ‘Ingkartala kunha rrangkarranha althakalthilitjina.’ Atha relha panga ntjarranha ilitjika, ‘Ingkartala kunha alknga rrakangkarranha wotha marrilitjina.’ Atha relha nakapakarlerrakala ntjarranha ilitjika, ‘Ingkartala kunha rrangkarranha tangkalhelitjina’.

¹⁹Atha turta relha ingkarrakanha ilitjika, ‘Antala era kala namantama, antala nhanga ekuralala Altjirranha relha ingkarrakaka montjamontja ntelalhitjika nakala.’”

²⁰Jesualantama pepa erinha wotha marntilamala artwa nhanganhantema nthitjalpuka. Kurunga era arrarnalhaka, relha ntjarranha kaltjinthitjika. Relha synagogue-ala namala ntjarralantama erinha intarra araka.

²¹Erantama etnanha ilaka, “Lyarta Altjirraka Angkatja Imankinya nhanha nthurrperrakantama, rrangkarra erinha wumalangantema.”