Luk 4:14-21

¹⁴Io, Jisas ga tapukus tika ma ra dadas tano Tanuo u Galili, ma ra hinhinawas utana ga haan hurbit ta ira tamtaman ta iakano katon.

¹⁵Ga hausur ira matanaiabar narako ta ira hala na lotu gar na Iudeia ma diet bakut diet ga pirlat ie.

¹⁶Ga haan u Nasaret, no taman ga tamat um kaia. Ma tano Bung na Sinangeh ga laka tano hala na lotu gar na Iudeia hoing at git gilgil huo. Haan, ga tur wara waswas ira nianga gar ta God di ga pakat.

¹⁷Io, di ga tar ira pakpakat gar tane Aisaia no tangesot tana. Ga palas ie gaam nes leh no katon ira pakpakat tana ga tange hoken:

¹⁸“No Tanuo gar tano Watong i kis tagu kanong i te gilamis iau bia ni hinawase ira maris tano tahut na hinhinawas. I te tule iau bia ni hinawase diet ira hiruo ing di ga kilat bat diet bia diet naga langalanga baling. I te tule iau wara tangtange ta ira pulo bia diet na nanaas um, ma bia ni halangalanga ise diet ing di la umubal diet,

¹⁹ma wara hinhinawas bia no bilai na pakana bung na harharahut gar tano Watong i te hanuat.”

²⁰Io, ga puli habaling ira pakpakat gaam tar sei tano ut na harbalaurai ta ira pakpakat. Io, ga kis. Ma diet bakut kaia narako tano hala na lotu diet ga mate dit tar ie.

²¹Io, ga tange ta diet hoken: “Katin iakan ra katon meram ta ira pakpakat gar ta God i te hanuat tutun ta ira numuat hinadoda.”