Romanos 14:11-17

¹¹Ma jewaꞌ ri tzꞌibꞌital kan chupa Ruchꞌaꞌtem ri Dios: Paqatzij wi Riꞌin in kꞌaslik, kacha ri Qajawal, y paqatzij wi, chinuwach Riꞌin kakixukubꞌaꞌ na kibꞌ konoje ri tikawex, y rukꞌ ruchiꞌ kiqul konoje kakibꞌiꞌij panuwi Riꞌin, xew Riꞌin in Dios kachaꞌ.

¹²Jekꞌuriꞌlaꞌ kopon jun qꞌij echiriꞌ qonoje kojeꞌela chwach ri Dios y ekꞌu Rire kaqꞌalajisan re we utz o na utz ta ri qaꞌanom.

¹³E uwariꞌche maqaꞌan chi oj qꞌatal tzij chiqibꞌil qibꞌ; mojuꞌan ne latzꞌanel o tzaqibꞌal che juna hermano.

¹⁴Puwi ri yaꞌtalik re katijik, riꞌin lik wetaꞌam ruma ri Qanimajawal Jesús y lik nujikibꞌam kꞌu uwach waꞌ: Ronoje utz y na chꞌul taj chwach ri Dios. Noꞌj we kꞌo junoq kuchꞌobꞌo kꞌo ri katijik “chꞌul”, riꞌ xew chwach rire chꞌul wi.

¹⁵Yey we ruma ri katij la, kapaxij la ukꞌuꞌx ri hermano la, riꞌ ri katajin la che ukꞌutik na e ta chi ri rutzil kꞌuꞌxaj. Ruma kꞌu waꞌ, lik na ubꞌe taj xa ruma ri katij la, kꞌo junoq karesaj ribꞌ chirij ri Cristo yey ruma ne rire xkam ri Cristo.

¹⁶Makꞌo kꞌu maꞌan alaq we rukꞌ waꞌ tzel kachꞌaꞌtibꞌex lo ri bꞌinik silabꞌik alaq, tobꞌ ne lik utz chiwach ralaq.

¹⁷Yey chupa rutaqanik ri Dios ri lik chirajawaxik wi na e ta saꞌ ri waꞌim kaqatijo o saꞌ ri qayaꞌ kaqaqumu; ma e ri kojbꞌin jusukꞌ, ri kojkꞌojiꞌ chi utzil chomal y rukꞌ kiꞌkotemal ruma rutoꞌbꞌal ri Santowilaj Ruxlabꞌixel ri Dios.