Rom 14:11-17

¹¹Got oh gonsi dirnong nasam inahatipramur ritporhan ma brak matpa meng oh mamaru hat patmur. Hanipyah norhor da dipwi patru pat han ohoh ihan norhe napotiproh meng moh arpin meng napotiprohmur. Kuuhan gonsi guroh norhornong Hanipyah gorhorwimuro napotinmat oh gur katin takir tongnom Hanipyah gorhor pokwimur napor armi nahaprimur. ritporhan brak matpamur.

¹²Ihtin han ohoh ihan ma brak matpa mengru mat orhor gonsi dir diradire ma ihashe menghe orhornong diradir gonsi nitat potiprimur.

¹³Got orhorwi gonsi dirnong imat nasatipra ohoh ihan guragurhe Go er hat pat hanmur por sapri. Ihan gur mamaru hat dahat patenmur. Noh arwananah ihir ambir tem royao sareng put teinong ham tapayao hapririm noh ihirnong ihtin er da na pinggiprohmur dahat patenmur.

¹⁴Noh Hanipyah Jisas ohsi tap hat patin orhor am nahatporhan noh mama meng moh am ham dahapatmur. Erer ma gonsi dapti ohe pe oh Got orhe kintei er hat na sapti ma hapat dahapatmur. Tit han tit Mama han moh awam na dapti hanmur ripathanoh ama han orhe boknong ohwi awam han hat patmur.

¹⁵Noh ihat dahapat orhor ire Ama han oh awam na dapti hanmur pot papatnong oh gur ire kintei oh dapri. Dayahanoh orhorhe Ihir daya moh nohhe dipora rim diprohmur. Dama orhe da oh Gin noh er hah sa dahatiprohmur. Ma ihtiproh oh gur ohe danong na ham ihtiperhan orhor dam da er hatiprohmur. Gure ma ihapti da oh ama ihat pat han orhe gwemat Krais oh haputip ohoh ihan gur Dir ohe Krais ohe danong hat pat da moh sum aer matipri daham guragure Moh yahwiwa daham ma dapti den oh ire kintei oh dapri. Mandanmur.

¹⁶Gur imat na mandama yahwiwa ma dahapti danong asoh ham tit han ohe dahat pat danong asoh aer deiyahanoh kat kuuhan ihir gurnong wanahama Gur moh aer deiyamur napotiprohe ohoh ihan gur Dir ihyahanoh tit ohe dahat pat danong asoh aer matiprohekin daham mandanmur.

¹⁷Dir Got orhe napapindin hrepnong hat ma pati oh Moh yah tommur. Moh er tommur. Moh yah denmur. Moh er denmur ripti ohe danong hatinmat ihat patida. Basra. Duung dasi hat son ohe dao manap goshat indin ohe dao Yahsup orhe ma inahapat ohe amam danong hat son ohe dao ama isip hat pat danong oh hatinmat orhe napapat hrepnong hat patimur.