Rom 14:11-17

¹¹I buku none sahou mene ndratorowenei: “Laban tiye anya, ‘Jo ma mulin kahis le; Idah kameh, lau mari aluh a andri ma atehei bwili ndru-u iri i andri are madak, Ma iri mari kameh tiye eme lewen anya, ehe, jo Kindrei handru.’”

¹²Ya eme ta sendrehendreh ta aliy i buku doh: Idah kameh, taha ari ari kameh asehek sasah taha amekes ndra-in o mwasin i ta Kindrei.

¹³Eme ya, ou sasehek ndramak ari ari anya iy badeh, ba-en hamon ta batanau malen bwe, ndri-iy. Arile ou amekes budon tam ki buku doh: Jo badeh, samekes ari lakou ta amekes nadu tine ari ja ato-ak ta aliy, ma jo samekes ari sahou ta sokoso-ou budon tan, ndri-iy.

¹⁴Eme ya, jo katiye kamwenen; jo dah badu hawe Laban Jises. Ya jo ndratanan handru en, ta nyamon mari kede-eh ndra mwasin le, ya ari ndra-in aliy bwe. Arile, i buku none ari ndramak anya iy beleben badeh, mwasin, lakou ta budon tan ai, ma mesekei iy baimon nyamon bwe.

¹⁵Arile, i buku none ou aimon nyamon nane nadu tinem ari ja beleben, ya mesekei budon tan andra-i badeh, ou bamekes mwasin bala tan bwai, ma kandriyen tam leheya ta ou baseken iy handru bwe. Eme ma, nyamon ou aimon badeh, samesekei budon ta nadu tinem sandra-i. Tasah, ndramak doh, Krais mene imek ta aseben iy!

¹⁶Ya, buku ou abudon anya, “Lakou doh mwasin, jo winiyan ta amekes ai,” arile ou abudon amwenen op! Kora-on lakou ou amekes doh kasahan ndra-in udu bolo budon ta ndramak ari ja.

¹⁷Tasah, tondrok ta Kindrei badeh, bala buku none kandriyen ta aimon nyamon ma a-un gwa mari, ma hawe bala buku none kandriyen ta beleben, bwe. Arile, lakou laba tinan ta tondrok ta Kindrei badeh, ndra kandriyen mwasin le, ma kandriyen ta mondrei le, ma hawe kandriyen ta sekesek le i san ta Malawin Ndrabun.