Roma 14:11-17

¹¹Sama leo neni surak nai Manetualain Susura Malalaon numa lele uluk mai nae, “Ita Lamatuan mesa kana ndia nafada nae, ‘Basa hatahorir neu ko sendek luu-langgan nara fo doꞌor neu Au, ma ratudu hada-horomatak neu Au. Hatahori esa-esak neu ko pake bafan nara fo manaku ma koa-kio Au rae, Au dadi uu sira Lamatuan fo naena haak parenda sara, nahuu Au ia, Manetualain.’ ”

¹²Dadi ita basa ngga muste taselu-tataa talan fo tafada Lamatuak tae, ita tao talo bee, ma tao hata de ita tao talo naa.

¹³Fai uluk ei marai Roma soa ndae salak makandoo neu ei toranoo saranim mara. Boso bei talo naa bali! Malole lenak ita taketu talo ia: ta bole tao ita toranoon nara rakatunu. Ita boso soba ike takatutudak kasa fo ara tao salak.

¹⁴Huu au akaesa ua ita Lamatuan Yesus, au bubuluk no tetuk, talo ia: ta hambu nanaꞌa-nininuk hata esa boe na, fo bisa tao nanggenggeo hatahori, losa ana ta bisa hule-haradoi neu Lamatuak. Tehuu mete ma hatahori esa duꞌa nae, nanaꞌa-nininuk esa tao nanggenggeon losa ana nameda ta naena haak fo hule-haradoi bali, elan fo nanaꞌa-nininuk naa dadi neu nelulik soa-neun.

¹⁵Haꞌi netuduk leo, mete ma o muꞌa mbaa, ma naa tao nala o toranoom dalen sona, na, o ta matudu o susuem neun ena, hetu? Makatataak aom dei! Boso makalulutu o toranoom nemeheheren, nahuu kada o mae muꞌa-minu matak esa! Huu Karistus oo mate soa-neu hatahori naa boe.

¹⁶Ta malole mete ma o tao hata esa fo mameda mae neulauk, tehuu hatahori laen nara kokolak raboboo o nadem, nahuu ara duꞌa rae o taok naa, manggarauk.

¹⁷Duꞌa matalolole! Manetualain naa, ita Manen. Tehuu ita ta dadi teu Manek hatahorin, nahuu kada ita taꞌa-tinu tungga hohoro-lalanek mesa kana. Taa! Mete ma ita nau dadi teu Manek hatahorin, ita muste tao hata fo ndoos, ita dalen lolo-laok, ita leo-laꞌo no ndoos ma mole-damek, ma ita dalen namahoko. Basa iar bisa dadi, mete ma ita takaesa takandoo to Manetualain Dula-dale Malalaon.